ايەلدەرگە قاراعاندا ەر ادامدار قاتەرلى ىسىكتەن ءجيى قايتىس بولادى – د س م

 قازاقستاندا سوڭعى 20 جىلدا قاتەرلى ىسىكپەن سىرقاتتانۋ دەڭگەيى 25 پايىزعا ارتتى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگىدە دەنساۋلىق ساقتاۋ ۆيتسە- ءمينيسترى ۆياچەسلاۆ دۋدنيك ءمالىم ەتتى، دەپ حابارلايدى Kazinform.

«ەرتە مە، كەش پە پلانەتانىڭ ءاربىر 5- تۇرعىنى قاتەرلى ىسىككە شالدىعادى. ءاربىر 8- ەر ادام جانە ءاربىر 11- ايەل وسى اۋرۋدان قايتىس بولادى. مۇنداي سانداردى دۇنيەجۇزىلىك دەنساۋلىق ساقتاۋ ۇيىمى كەلتىرىپ وتىر. ءولىم بويىنشا قاتەرلى ىسىك جۇرەك- قان تامىرلارى اۋرۋلارىنان كەيىن ەكىنشى ورىندا تۇر. بۇكىل الەمدە قاتەرلى ىسىك اۋرۋى تۇراقتى تۇردە وسۋدە. قازاقستاندا سوڭعى 20 جىلدا ونكوپاتولوگيامەن سىرقاتتانۋشىلىق %25 عا ارتتى»، - دەدى ۆياچەسلاۆ دۋدنيك.

ونىڭ ايتۋىنشا، جىل سايىن قاتەرلى ىسىكتىڭ 30 مىڭعا جۋىق جاڭا جاعدايى انىقتالادى. بۇگىندە ونكولوگياعا شالدىققان 217 مىڭنان استام پاتسيەنت ديناميكالىق باقىلاۋدا تۇر. ناۋقاستاردىڭ 56 پايىزى - 18 بەن 63 جاس ارالىعىنداعى ەڭبەككە قابىلەتتى ادامدار. ۆياچەسلاۆ دۋدنيك اتاپ وتكەندەي، قاتەرلى ىسىكپەن ەر ادامدارعا قاراعاندا ايەلدەر ءجيى اۋىرادى.

«تارالۋى بويىنشا ءبىرىنشى ورىندا - ءسۇت بەزى وبىرى، ەكىنشى ورىندا - وكپە وبىرى، ءۇشىنشى ورىندا ىشەك وبىرى تۇر. جىل سايىن 5 مىڭ ايەلگە ءسۇت بەزى قاتەرلى ىسىگىنىڭ دياگنوزى قويىلادى. ەلىمىزدە جىل سايىن 13 مىڭنان استام ادام قاتەرلى ىسىكتەن قايتىس بولادى. اسىرەسە، قاتەرلى ىسىكتەن ەر ادامدار ءجيى ولەدى»، - دەپ دەرەكتەر كەلتىردى ۆيتسە- مينيستر.

ۆياچەسلاۆ دۋدنيك كەلتىرگەن دەرەككە ساي، ەلىمىزدە 2 مىڭنان استام تەكسەرۋ كابينەتى بار جانە ولاردا 500 دەن استام ونكولوگ- دارىگەر جۇمىس ىستەيدى.