ايەلدەرگە جالعىز ساياحاتتاۋعا بولاتىن ەلدەر
استانا. KAZINFORM - جالعىز ساياحاتتاۋ ەركىندىك سىلايتىنى ءسوزسىز. ءوز ۋاقىتىڭدى ءوزىڭ جوسپارلاپ، قالاعان جەرىڭدە كىدىرىپ، قالاعانىڭدى كورۋ - مۇنىڭ ءبارى ساياحاتتىڭ قۇندىلىعىن ارتتىرا تۇسەدى.
دەگەنمەن جالعىز ساياحاتتاۋ بارىنە بىردەي قولايلى دەپ ايتا المايسىڭ. اسىرەسە قاۋىپسىزدىك ماسەلەسى كوپشىلىكتى ويلاندىراتىنى انىق.
سوعان قاراماستان، الەمدىك تاجىريبەنى سارالاعان حالىقارالىق زەرتتەۋلەر جالعىز ساياحاتتايتىن ايەلدەر ءۇشىن ەڭ قولايلى ەلدەردى انىقتاعان.
بۇل رەتتە Georgetown University ازىرلەگەن Women ،Peace and Security Index جانە Global Peace Index دەرەكتەرى نەگىزگە الىنعان. ءبىرى - ايەلدەردىڭ قاۋىپسىزدىگى مەن قۇقىقتارىن، ەكىنشىسى - ەلدەگى جالپى تۇراقتىلىق پەن بەيبىت احۋالدى باعالايدى. وسى ەكى يندەكستى سالىستىرا وتىرىپ، 2026-جىلى جالعىز ساياحاتتاۋعا ەڭ قولايلى بەس باعىتتى ۇسىندى.
ەستونيا - تىنىشتىق پەن تاريح ۇيلەسىمى
بالتىق جاعالاۋىنداعى شاعىن عانا مەملەكەت قاۋىپسىزدىگىمەن جانە ىقشام ينفراقۇرىلىمىمەن ەرەكشەلەنەدى. ەل استاناسى تاللين - قىسقا دەمالىسقا تاپتىرماس باعىت. يۋنەسكو تىزىمىنە ەنگەن ەسكى قالاسى تۋريستەرگە اداسپاي سەرۋەندەۋگە مۇمكىندىك بەرەدى.
تاريحقا قىزىعاتىندار ءۇشىن Vabamu Museum of Occupations and Freedom ەرەكشە اسەر قالدىرادى. ال ەلدىڭ شىنايى تىنىسىن سەزىنگىڭىز كەلسە، كيحنۋ ارالىنا ات باسىن بۇرعان ءجون. مۇندا ايەلدەردىڭ قوعامداعى ءرولى ايرىقشا - ولار ارال تىرشىلىگىنىڭ نەگىزگى قوزعاۋشى كۇشى.
نورۆەگيا - تابيعاتپەن ۇندەستىك
سكانديناۆيا ەلدەرىندە قاۋىپسىزدىك دەڭگەيى باستى نازاردا ەكەنىن كوپشىلىك ونسىز دا بىلەدى. نورۆەگيا دا سونداي ەلدەردىڭ قاتارىندا. تاۋلى پەيزاجدارى مەن فوردتارى بەلسەندى دەمالىستى قۇپ كورەتىندەر ءۇشىن ناعىز جۇماق ءتارىزدى.
وسلو، بەرگەن، ترومسە سياقتى قالالار شاعىن ءارى ىڭعايلى. ال باعىتتار ناقتى بەلگىلەنىپ، قاۋىپسىزدىك دەڭگەيى جوعارى. بۇل جالعىز ساياحاتتاۋشىلار ءۇشىن باستى ارتىقشىلىق بولسا كەرەك.
كوستا-ريكا - تابيعات پەن ەركىندىك مەكەنى
«Pura vida» - ياعني «قاراپايىم ءارى باقىتتى ءومىر» ۇستانىمى بۇل ەلدىڭ فيلوسوفياسىنا اينالعان. كوستا-ريكا كاريب تەڭىزىنە دە، تىنىق مۇحيتى جاعالاۋىنا دا شىعا الادى.
ەكزوتيكالىق تابيعاتتى ۇناتاتىندار ءۇشىن Corcovado National Park جانە Manuel Antonio National Park ۇلتتىق پاركتەرى ەرەكشە اسەر سىيلايدى. مۇندا توپتىق تۋرلار دا كەڭ تارالعان، سوندىقتان جالعىز ساياحاتتا دا سەرىكتەس تابۋ قيىن ەمەس.
ۆەتنام - قولجەتىمدى باعىت
وڭتۇستىك-شىعىس ازياداعى ەڭ تانىمال باعىتتاردىڭ ءبىرى. باعاسىنىڭ قولجەتىمدىلىگى، مادەنيەتىنىڭ بايلىعى جانە تۋريستەرگە قولايلى ينفراقۇرىلىمى - مۇنىڭ ءبارى جالعىز ساياحاتتاۋشىلار ءۇشىن وتە ىڭعايلى.
مۇندا حوستەلدەر مەن وتباسىلىق قوناقۇيلەر (homestay) كوپ. بۇل تەك تۇرۋعا عانا ەمەس، جەرگىلىكتى حالىقپەن جاقىن تانىسۋعا مۇمكىندىك بەرەدى. سونىمەن قاتار ەل بويىنشا تۋريستىك مارشرۋتتاردىڭ كوپتىگى ساياحاتشىلاردى بىرىكتىرىپ، جاڭا ادامدارمەن تانىسۋعا جول اشادى.
ۋرۋگۆاي - تىنىشتىق ىزدەگەندەرگە ارنالعان مەكەن
وڭتۇستىك امەريكاداعى ەڭ قاۋىپسىز ەلدەردىڭ ءبىرى سانالادى. استاناسى مونتيەۆيدەو - قاربالاسى از، جايلى قالا.
ال تاريحي اتموسفەرانى سەزىنگىڭىز كەلسە، كولونيا-دەل-ساكرامەنتو قالاسىنا بارعان ءجون. دەمالىستى تەڭىز جاعاسىندا وتكىزگىسى كەلەتىندەر ءۇشىن پۋنتا-دەل-ەستە - ءمىنسىز تاڭداۋ.
جالعىز ساياحاتتاۋ جاڭا ەلدەردى باسقا قىرىنان كورۋ عانا ەمەس، ءوزىڭدى تانۋدىڭ دا بىردەن-ءبىر جولى. باستىسى، ساپارىڭىزدى سانالى تۇردە جوسپارلاپ، قاۋىپسىزدىك ەرەجەلەرىن ەستەن شىعارماساڭىز بولدى.
el.kz
