ايەل كۇيەۋىنەن كەك الامىن دەپ ءتورت بالاسىن وزەنگە اعىزىپ جىبەردى
استانا. KAZINFORM - تاجىكستاننىڭ فارحور اۋدانىندا قايعىلى وقيعا ورىن الدى. 27 جاستاعى كەلىنشەك وزەنگە ءتورت بالاسىمەن بىرگە سەكىرىپ كەتكەن، دەپ حابارلايدى El.kz ينتەرنەت پورتالى.
وقيعا 30-ماۋسىمعا قاراعان ءتۇنى بولعان. كۋاگەرلەر مەن رەسمي دەرەكتەرگە سۇيەنسەك، مادينا حاليموۆا ەسىمدى ايەل كۇيەۋىنىڭ باسقا ايەلى بارىن ەستىپ، قاتتى كۇيزەلىسكە ءتۇسىپ، كەك الۋ ماقساتىمەن وزىنە جانە بالالارىنا قول جۇمساۋعا شەشىم قابىلداعان. الايدا وزەنگە سەكىرگەن كەلىنشەك امان قالىپ، ءتورت بالاسى - ءۇش قىزى مەن ەكى ايلىق ۇلى - مەرت بولدى.
فارحورداعى بۇل وقيعا كوپشىلىكتى ءدۇر سىلكىندىردى. رەسمي مالىمەتكە سايكەس، كەلىنشەك الدىمەن ەكى بالاسىن، كەيىن تاعى ەكەۋىن سۋعا لاقتىرىپ، ارتىنان ءوزى سەكىرگەن. ءبىراق ايەل ءجۇزىپ شىعىپ، ءتىرى قالعان. بالالاردىڭ ۇلكەنى - بەس جاستاعى قىزى، ال كەنجەسى - نەبارى ەكى ايلىق مۇحامماد ەسىمدى ءسابي بولعان.
توتەنشە جاعدايلار جونىندەگى باسقارما بۇل وقيعاعا قاتىستى تەرگەۋ باستالعانىن مالىمدەدى. ايەلدىڭ كۇيەۋى كۋدراتۋللو شاريفوۆ بولسا، ەكىنشى ايەل ماسەلەسىنىڭ جالعان ەكەنىن ايتىپ، جۇبايىمەن ارالارىندا جانجال بولماعانىن جەتكىزدى. ول 30-ماۋسىم كۇنى تاڭەرتەڭ تۇرعاندا ايەلى مەن بالالارىنىڭ ۇيدە جوق ەكەنىن بايقاپ، ىزدەۋگە كىرىسكەن. سول ساتتە ايەلىنىڭ جازىپ قالدىرعان بىرنەشە حاتىن تاپقان.
حاتتاردىڭ بىرىندە: «لاتوفاتتىڭ اكەسى، مەنى كەشىر. مەن ساعان جاقسى جار بولا المادىم، ساعان قىزمەت ەتە المادىم»، - دەگەن سوزدەر جازىلعان.
وسىدان كەيىن كۇيەۋى دەرەۋ تۋىستارىنا حابار بەرىپ، پوليتسياعا ارىز جازعان. كەيىن اعاسىنىڭ قوڭىراۋى ارقىلى كەلىنشەكتىڭ تابىلعانى بەلگىلى بولادى. حاليموۆا پوليتسياعا بەرگەن تۇسىنىكتەمەسىندە تۇندە ەكى بەلگىسىز ەر ادامنىڭ كەلىپ، بالالاردى وزەنگە تاستاۋدى بۇيىرعانىن ايتقان. كۇيەۋىنىڭ ايتۋىنشا، ول بۇعان دەيىن دە ساندىراقتاپ سويلەيتىن، ال ايەلدىڭ اعاسى دا بۇعان دەيىن ءوزىن-ءوزى ولتىرگەن ەكەن.
قازىر «ادام ءولتىرۋ» بابى بويىنشا قىلمىستىق ءىس قوزعالدى. ساراپشىلار مەن تەرگەۋشىلەر كەلىنشەكتىڭ پسيحيكالىق دەنساۋلىعىن تەكسەرىپ، بۇل ارەكەتتىڭ سەبەپتەرىن تەرەڭ زەرتتەۋدە.
