اتىراۋدا اۋدان اكىمىنىڭ ايەلى كۇيەۋىنەن ءزابىر كورگەنىن ايتتى

اتىراۋ. KAZINFORM - اتىراۋ وبلىسىندا اۋدان اكىمىنىڭ ايەلى تۇرمىستىق زورلىق- زومبىلىققا ۇشىراعانىن جەتكىزدى.

ايەلدىڭ ايتۋىنشا، كۇيەۋى وعان بىرنەشە رەت قول كوتەرگەن. ءزابىر كورگەن ايەلدىڭ ۆيدەوسى الەۋمەتتىك جەلىدە تارادى.

«بىرگە تۇرعان 11 جىلدىڭ ىشىندە بالالارىمىزدىڭ كوزىنشە ۇردى. ماسەلەن، 2021 -جىلى تاڭعى ساعات 04:00-تە ماس كۇيدە مەنى بالالاردىڭ كوزىنشە ۇرىپ، بەتىمە جاراقات سالدى. وسىدان كەيىن امالسىز جەدەل جاردەم مەن پوليتسيا شاقىرۋعا ءماجبۇر بولدىم. بالالارىمىز ءۇشىن شاعىمىمدى قايتىپ الۋىمدى سۇرادى. بۇل جاعداي 2023 -جىلعى 31-مامىردا تاعى قايتالاندى. تاعى دا بالالاردىڭ كوزىنشە مەنى تەۋىپ، ۇرىپ-سوقتى. مەنى مۇگەدەك قىلامىن دەپ قورقىتتى. ومىرتقام سىنىپ، ءبىر اي جۇرە الماي قالدىم. وسى ۋاقىتتا ءوزىنىڭ تانىستارىن پايدالانىپ، بالالارىمدى تارتىپ الدى»، - دەدى ءزابىر كورگەن ايەل.

اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، اۋدان اكىمىنە قاتىستى قىلمىستىق ءىس ق ر قىلمىستىق كودەكسىنىڭ 107-بابىنىڭ 2-بولىگىمەن تەرگەلگەن. قىلمىستىق ءىس اقپان ايىندا سوتقا جىبەرىلگەن.

اتىراۋ وبلىسى اكىمىنىڭ باسپا ءسوز قىزمەتىنەن ءمالىم ەتكەندەي، اۋدان اكىمىنىڭ بۇرىنعى جۇبايى اكىمدىككە جۇگىنبەگەن.

«ازاماتشا ا. ۇمبەتقاليەۆا اتىراۋ وبلىسىنىڭ اكىمدىگىنە جۇگىنبەگەنىن حابارلايمىز. تۋىنداعان ءمان-جايلارعا بايلانىستى قىزمەتتىك تەكسەرۋ تاعايىندالدى»، - دەپ حابارلادى وبلىس اكىمىنىڭ باسپا ءسوز قىزمەتى.

ال اتىراۋ وبلىستىق سوتىنىڭ باسپا ءسوز قىزمەتى اۋدان اكىمىنە قاتىستى قىلمىستىق ءىستىڭ قارالىپ جاتقانىن راستادى.

«قىلمىستىق ءىس اتىراۋ قالاسىنىڭ №2 سوتىندا قارالىپ جاتىر. كەلەسى سوت وتىرىسى 29-مامىردا ساعات 10:00-دە وتەدى»، - دەپ ءمالىم ەتتى وبلىستىق سوتتىڭ باسپا ءسوز قىزمەتىنەن.

اۆتور

جولداسبەك شوپەعۇل