اۋىل شارۋاشىلىعىندا ستاتيستيكانىڭ بۇرمالانۋىنا جول بەرمەۋ ءۇشىن نە ىستەلىنبەك
استانا. KAZINFORM - بيىل ەلىمىزدە وسىمدىك شارۋاشىلىعىنداعى ءونىمدى قاداعالاۋ اقپاراتتىق جۇيەسى ىسكە قوسىلادى. بۇل جايىندا اۋىل شارۋاشىلىعى مينيسترلىگىنەن ءمالىم ەتتى.
- مەملەكەت باسشىسىنىڭ تاپسىرماسى بويىنشا وتكەن جىلى اگروونەركاسىپتىك كەشەندەگى بۇرمالانعان ستاتيستيكالىق دەرەكتەردى رەتكە كەلتىرۋ جۇمىستارى جۇرگىزىلدى. ناتيجەسىندە مال شارۋاشىلىعىندا 2 ميلليون ءىرى قارا، 3,2 ميلليون ۇساق مال جانە 3 ميلليون توننا ءسۇت پەن باسقا دا ونىمدەر، وسىمدىك شارۋاشىلىعىندا 1,7 ميلليون توننا كارتوپ پەن 315 مىڭ توننا پياز ەسەپتەن شىعارىلدى. جاڭارتىلعان دەرەكتەر ىشكى نارىقتى رەتتەۋ بويىنشا شەشىمدەر قابىلداۋ مەن جوسپارلاۋ ساپاسىن ارتتىرۋعا مۇمكىندىك بەرەدى. جالعان كورسەتكىشتەردىڭ قايتالانۋىنىڭ الدىن الۋ ءۇشىن اۋىل شارۋاشىلىعى سالاسىندا ءونىمدى ەسەپكە الۋ جانە قاداعالاۋ بويىنشا اقپاراتتىق جۇيەلەر ەنگىزىلىپ جاتىر. وسىعان وراي، وسىمدىك شارۋاشىلىعىنداعى ءونىمدى قاداعالاۋ اقپاراتتىق جۇيەسى، ونىڭ ىشىندە استىق بويىنشا جۇيە ازىرلەندى. جۇيەنى ىسكە قوسۋ 2025 -جىلعا جوسپارلانعان. بۇل جۇيە «ەگىستەن سورەگە دەيىن» قاعيداتى بويىنشا وسىمدىك شارۋاشىلىعى ونىمدەردى ەسەپكە الۋ مەن مونيتورينگ جۇرگىزۋ پروتسەستەرىن اۆتوماتتاندىرۋعا باعىتتالعان. جۇيە ءوندىرىس، ساقتاۋ، تاسىمالداۋ جانە وتكىزۋ كەزەڭدەرىندەگى اشىقتىق پەن باقىلاۋدى قامتاماسىز ەتەدى، - دەدى مينيسترلىكتەن اگەنتتىك ساۋالىنا وراي.
ۆەدومستۆو مالىمەتىنشە، 2025 -جىلدىڭ باسىنان باستاپ، اقمولا وبلىسىندا وسىمدىك شارۋاشىلىعىنداعى ءونىمدى قاداعالاۋ اقپاراتتىق جۇيەسىن پيلوتتىق رەجيمدە ەنگىزۋ جۇمىستارى باستالدى. پيلوتتىق جوبا ءساتتى اياقتالعاننان كەيىن ول قازاقستاننىڭ بارلىق وڭىرىنە ەنگىزىلمەك.
سونىمەن قاتار مينيسترلىك مەملەكەت باسشىسىنىڭ تاپسىرماسىنا سايكەس، بيىل 1-تامىز بەن 20-قازان ارالىعىندا ۇلتتىق اۋىل شارۋاشىلىعى ساناعىن جۇرگىزۋ كوزدەلگەنىن اتاپ وتەدى.
- جالپى، اۋىل شارۋاشىلىعى ساناعى ەلىمىزدەگى اۋىل شارۋاشىلىعىنىڭ جاي-كۇيى مەن دامۋ ۇردىستەرى تۋرالى تولىق ءارى شىنايى اقپارات الۋعا مۇمكىندىك بەرەدى. بۇل ءوز كەزەگىندە مەملەكەتتىك اگرارلىق ساياساتتىڭ تيىمدىلىگىن ارتتىرىپ، بيزنەس پەن حالىق ءۇشىن شەشىم قابىلداۋعا نەگىز بولاتىن سەنىمدى دەرەككوزىنە اينالادى. سالاداعى ستاتيستيكالىق دەرەكتەردىڭ بۇرمالانۋ ماسەلەسىن جۇيەلى شەشۋ ءۇشىن مەملەكەت باسشىسىنىڭ 2024 -جىلعى 2-قىركۇيەكتەگى قازاقستان حالقىنا جولداۋىن ىسكە اسىرۋ جونىندەگى جالپى ۇلتتىق ءىس-شارالار جوسپارىنىڭ 18-تارماعىنا سايكەس، ارنايى جول كارتاسى ازىرلەنىپ، بەكىتىلدى. وندا مال جانە وسىمدىك شارۋاشىلىعىنداعى ستاتيستيكالىق دەرەكتەردىڭ شىنايىلىعىن قامتاماسىز ەتۋگە باعىتتالعان، سونداي-اق اۋىل شارۋاشىلىعى تاۋار وندىرۋشىلەرىنە مەملەكەتتىك قولداۋ كورسەتۋ كەزىندە زاڭ بۇزۋشىلىقتارعا جول بەرمەۋگە ىقپال ەتەتىن جۇيەلى شارالار كوزدەلگەن، - دەدى مينيسترلىكتەن.
وتكەن جىلدىڭ ماۋسىمىندا پارلامەنت ماجىلىسىندە وتكەن مال شارۋاشىلىعى ونىمدەرىن تەرەڭ وڭدەۋ تاقىرىبىنا ارنالعان ۇكىمەت ساعاتىندا اۋىل شارۋاشىلىعى ءمينيسترى ايداربەك ساپاروۆ ءبىراز جىلدار بويى مال شارۋاشىلىعىندا دا، وسىمدىك شارۋاشىلىعىندا دا ستاتيستيكالىق دەرەكتەر بۇرمالانىپ كەلگەنىن ايتقان ەدى.
