اۋىل شارۋاشىلىعىنا جۇمسالاتىن سۋدىڭ 45 پايىزى ىسىراپ بولىپ جاتىر - ناتاليا گودۋنوۆا

ماجىلىستە جوعارى اۋديتورلىق پالاتانىڭ ءتورايىمى ناتاليا گودۋنوۆا سۋ رەسۋرستارىنىڭ باسقارىلۋ تيىمدىلىگىنە جۇرگىزىلگەن اۋديتورلىق ءىس- شارالاردىڭ قورىتىندىسىن تانىستىردى، دەپ حابارلايدى Kazinform.

«وزگە ەلدەرمەن سالىستىرعاندا ءبىز ءىس جۇزىندە سۋ ۇنەمدەۋ تەحنولوگيالارىن قولدانبايمىز نەمەسە وتە سيرەك قولدانامىز. ەسكى كانالدار مەن توزىعى جەتكەن جەلىلەردە ىسىراپ بولىپ جاتقان سۋدىڭ كولەمى وتە ۇلكەن. ءبىز ەسەپتەدىك. 2022 -جىلى اۋىل شارۋاشىلىعىندا عانا ىسىراپ بولعان سۋدىڭ كولەمى 5,2 تەكشە شاقىرىم بولعان. بۇل سالاعا الىنعان سۋدىڭ 45 پايىزى دەگەن ءسوز»، - دەدى ول.

ناتاليا گودۋنوۆا بۇل شىعىندى جويسا، ترانسشەكارالىق وزەندەرگە تاۋەلدىلىكتەن ارىلۋعا بولاتىنىن ايتادى.

«ال ترانسشەكارالىق وزەندەر ارقىلى سىرتتان كەلەتىن سۋدىڭ تاپشىلىعى بىلتىر 0,8 تەكشە شاقىرىم بولعان. وسىدان-اق سۋ ۇنەمدەۋ تەحنولوگياسىن جاپپاي ەنگىزۋ ارقىلى ترانسشەكارالىق وزەندەردەن كەلەتىن سۋدىڭ تاپشىلىعىن قالاي جابۋعا بولاتىنىن وزدەرىڭىز دە باعالاي الاسىزدار»، - دەدى جوعارى اۋديتورلىق پالاتا باسشىسى.

اۆتور

ەسىمجان ناقتىباي