اۋىل شارۋاشىلىعى ساناعى: دەرەك بەرۋدەن باس تارتقاندارعا قانداي جازا بار

استانا. KAZINFORM - اۋىل شارۋاشىلىعى ساناعى كەزىندە مالىمەت بەرۋدەن باس تارتقان نەمەسە قاتە مالىمەت بەرگەن ادامدار اكىمشىلىك جاۋاپقا تارتىلادى. بۇل تۋرالى ۇلتتىق ستاتيستيكا بيۋروسى Kazinform اگەنتتىگىنىڭ رەسمي ساۋالىنا جولداعان جاۋاپتا ايتىلعان.

- «مەملەكەتتىك ستاتيستيكا تۋرالى» ق ر زاڭىنىڭ 21-بابى 5-تارماعىنا سايكەس ۇلتتىق ساناقتاردى جۇرگىزۋ كەزىندە باستاپقى ستاتيستيكالىق دەرەكتەردى رەسپوندەنتتەر مىندەتتى تۇردە ۇسىنادى. زاڭنىڭ 1-بابىنىڭ 3-4-تارماقشاسىنا سايكەس باستاپقى ستاتيستيكالىق دەرەكتەر - ستاتيستيكالىق نىسانداردا الىنعان نەمەسە تىركەلگەن دەرەكتەر. «اكىمشىلىك قۇقىق بۇزۋشىلىق تۋرالى» كودەكستىڭ 719-بابىنا سايكەس مەملەكەتتىك ستاتيستيكا سالاسىنداعى ۋاكىلەتتى ورگان وسى كودەكستىڭ 497-بابىندا (باستاپقى ستاتيستيكالىق دەرەكتەردى بەرۋ ءتارتىبىن بۇزۋ) كوزدەلگەن اكىمشىلىك قۇقىق بۇزۋشىلىق تۋرالى ىستەردى قارايدى، - دەلىنگەن حابارلامادا.

اتالعان 497-بابقا سايكەس، باستاپقى ستاتيستيكالىق دەرەكتەردى ۇسىنۋ ءتارتىبىن بۇزعاندارعا مىنانداي جازا قاراستىرىلعان:

مەملەكەتتىك ستاتيستيكانىڭ ءتيىستى ورگاندارىنا انىق ەمەس باستاپقى ستاتيستيكالىق دەرەكتەردى ۇسىنعاندارعا ەسكەرتۋ جاسالادى.
مەملەكەتتىك ستاتيستيكانىڭ ءتيىستى ورگاندارىنا باستاپقى ستاتيستيكالىق دەرەكتەردى بەلگىلەنگەن مەرزىمدە ۇسىنباۋ: جەكە تۇلعالارعا - 10، لاۋازىمدى ادامدارعا، كوممەرتسيالىق ەمەس ۇيىمدارعا، شاعىن كاسىپكەرلىك سۋبەكتىلەرىنە - 14، ورتا كاسىپكەرلىك سۋبەكتىلەرىنە - 20، ءىرى كاسىپكەرلىك سۋبەكتىلەرىنە 120 ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى.
وسى باپتىڭ ءبىرىنشى جانە ەكىنشى بولىكتەرىندە كوزدەلگەن، اكىمشىلىك جازا قولدانىلعاننان كەيىن بىر جىل ىشىندە قايتالاپ جاسالعان ءىس-ارەكەتتەر: جەكە تۇلعالارعا - 14، لاۋازىمدى ادامدارعا، كوممەرتسيالىق ەمەس ۇيىمدارعا، شاعىن كاسىپكەرلىك سۋبەكتىلەرىنە - 20، ورتا كاسىپكەرلىك سۋبەكتىلەرىنە - 40، ءىرى كاسىپكەرلىك سۋبەكتىلەرىنە ءبىر ءجۇز ەلۋ ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى.
سونىمەن قاتار، بيۋرو مۇنداي جاعدايدى بولدىرماس ءۇشىن ساناق الدىندا جەرگىلىكتى اكىمدىكتەرمەن بىرلەسە ءتۇسىندىرۋ جۇمىستارى جۇرگىزىلەتىنىن مالىمدەدى.

- باستاپقى ستاتيستيكالىق دەرەكتەردى ۇسىنۋ مەرزىمدەرى ستاتيستيكالىق نىسانداردىڭ تيتۋلدىق بەتتەرىندە كورسەتىلەدى. اۋىل شارۋاشىلىعى ساناعى بارىسىندا ءۇي شارۋاشىلىقتارىنان الىناتىن دەرەكتەردىڭ ماڭىزدىلىعىن ەسكەرە وتىرىپ، اكىمشىلىك جاۋاپكەرشىلىككە تارتۋ فاكتىلەرىن بولدىرماۋ ماقساتىندا جەرگىلىكتى اتقارۋشى ورگاندار وكىلدەرىنىڭ قاتىسۋىمەن اقپاراتتىق جانە قۇقىقتىق ءتۇسىندىرۋ جۇمىستارى جۇرگىزىلەدى، - دەلىنگەن حابارلامادا.

ايتا كەتەيىك، بىلتىر 54 ەلدى مەكەندە پيلوتتىق اۋىل شارۋاشىلىعى ساناعى وتكىزىلدى. سوندا ءۇي شارۋاشىلىقتارىنىڭ شامامەن %2 ى ساۋالناماعا قاتىسۋدان باس تارتقان بولاتىن.

اۆتور

ەربول جانات