اۋىل شارۋاشىلىعى قىزمەتكەرلەرى ءۇشىن زەينەت جاسىن قىسقارتۋ ۇسىنىلدى
استانا. KAZINFORM - اۋىل شارۋاشىلىعى ۆيتسە-ءمينيسترى امانعالي بەردالين ۇكىمەت وتىرىسىندا وسىنداي ۇسىنىس ايتتى.
ونىڭ ايتۋىنشا، قازاقستاننىڭ اگروونەركاسىپتىك كەشەنىندە 285,5 مىڭ ءونىم ءوندىرۋشى جۇمىس ىستەيدى، ولار شامامەن 1 ميلليون ادامدى جۇمىسپەن قامتىپ وتىر.
- ا و ك سالالارى بويىنشا شامامەن 6,5 مىڭ مامانعا قاجەتتىلىك بار، ونىڭ ىشىندە بىلىكتى قىزمەتكەرلەر بويىنشا - 3,5 مىڭنان استام جۇمىس ورنى بار. مينيسترلىك جاڭا جۇمىس ورىندارىن قۇرۋعا جانە ءوزىن-ءوزى جۇمىسپەن قامتىعانداردى ۇيىمداسقان شارۋاشىلىقتارعا كوشىرۋگە جاعداي جاساپ وتىر. «اۋىل اماناتى» باعدارلاماسىن ىسكە اسىرۋ جىلدارى اۋىلدا 115 ميلليارد تەڭگەگە 17 مىڭنان استام ميكروكرەديت بەرىلىپ، شامامەن 20 مىڭ جاڭا جۇمىس ورنى قۇرىلدى، - دەدى ا. بەردالين ۇكىمەتتىڭ بۇگىنگى وتىرىسىندا.
سونىمەن بىرگە، 2025 -جىلى 616 ميلليارد تەڭگەگە 285 ينۆەستيتسيالىق جوبانى ىسكە اسىرۋ جوسپارلانىپ وتىر، بۇل 6,3 مىڭ تۇراقتى جانە ۋاقىتشا جۇمىس ورنىن قۇرۋعا مۇمكىندىك بەرەدى.
ۇشىنشىدەن، ەڭبەك رەسۋرستارى بالانسىنىڭ بولجامىمەن اگرارلىق ماماندىقتارعا جىل سايىن شامامەن 4 مىڭ گرانت بولىنەدى. اۋىلدان شىققان تالاپكەرلەردى ىنتالاندىرۋ ءۇشىن اۋىلدىق كۆوتا قولدانىلادى. ول بۇكىل مەملەكەتتىك ءبىلىم بەرۋ تاپسىرىسىنىڭ %30- ىنان %35- ىنا دەيىن ۇلعايتىلدى. اۋىل كۆوتاسىمەن وقىعان تۇلەكتەر وقۋىن بىتىرگەن سوڭ كەمىندە ءۇش جىل اۋىلدا جۇمىس ىستەۋى كەرەك.
- سوڭعى جىلدارى زاماناۋي اۋىل شارۋاشىلىعى ۋاقىت تالابىمەن جاڭارىپ، سيفرلاندىرۋ ەسەبىنەن تەحنولوگيالىق جانە ءونىمدى سالاعا اينالدى. سونىمەن بىرگە، اۋىل شارۋاشىلىعى قىزمەتكەرلەرىنىڭ مارتەبەسى ارتىپ كەلەدى، ونى ودان ءارى كوتەرۋ ءۇشىن جالاقىنى ارتتىرۋ، زەينەت جاسىن تومەندەتۋ، اۋىل تۇرعىندارىنا الەۋمەتتىك تولەمدەرگە جوعارىلاتىلعان كوەففيسيەنت قولدانۋ ۇسىنىلىپ وتىر. بۇدان بولەك، اۋىلدا تۇرعىن ءۇي قۇرىلىسىنا ارنالعان سۋبسيديا نورماسىن ارتتىرۋ مۇمكىندىگىن قاراستىرۋ ۇسىنىلادى. بۇل شارالار ەڭبەك جاعدايىن جاقسارتۋعا، جاڭا كادرلاردى تارتۋعا جانە اۋىلدا ادامداردى تۇراقتاندىرۋعا مۇمكىندىك بەرەدى، - دەدى اۋىل شارۋاشىلىعى ۆيتسە-ءمينيسترى.
ايتا كەتەيىك، ەلىمىزدە زەينەتاقى دا اۆتوماتتى تۇردە تاعايىندالاتىن بولدى.
اۆتور
ايجان سەرىكجان قىزى
