«اۋىل» پارتياسىنىڭ ەكس-ءتوراعاسى عاني قاليەۆ ومىردەن ءوتتى

استانا. KAZINFORM - قازاقستاندىق عالىم، ەكونوميكا عىلىمدارىنىڭ دوكتورى، پروفەسسور، قازاقستان عىلىم اكادەمياسىنىڭ اكادەميگى، قازاقستاننىڭ ەڭبەك سىڭىرگەن عىلىم قايراتكەرى عاني قاليەۆ 86 جاسىندا ومىردەن ءوتتى.

عاني قاليەۆ ەلىمىزدىڭ ساياسي ومىرىنە دە بەلسەندى ارالاسقان، قر جوعارعى كەڭەسى مەن پارلامەنت ءماجىلىسىنىڭ دەپۋتاتى بولعان. سونىمەن قاتار «اۋىل» پارتياسىنىڭ ەكس-ءتوراعاسى.

ول 1938-جىلى جىلى 19- شىلدەدە جامبىل وبلىسىنىڭ شۋ اۋدانىنا قاراستى بەلباسار اۋىلىندا تۋعان.

ەڭبەك جولىن الماتى حالىق شارۋاشىلىعى ينستيتۋتىندا (قازىرگى قازاق ەكونوميكا ۋنيۆەرسيتەتى) وقىتۋشى بولىپ باستاعان.

1968-84-جىلدارى قازاقتىڭ اۋىل شارۋاشىلىق ەكونوميكاسى جانە ونى ۇيىمداستىرۋ عىلىمي-زەرتتەۋ ينستيتۋتىندا اعا عىلىمي قىزمەتكەر، سەكتور، ءبولىم مەڭگەرۋشىسى، ينستيتۋت ديرەكتورىنىڭ ورىنباسارى، ديرەكتورى (1988-96)؛

1984-88-جىلدارى قازاق قوي ءوسىرۋ تەحنولوگيا عىلىمي-زەرتتەۋ ينستيتۋتىنىڭ ديرەكتورى؛

1991-96-جىلدارى قازاق اۋىل شارۋاشىلىق عىلىمدارى اكادەمياسىنىڭ پرەزيدەنتى بولدى.

1999-جىلدان باستاپ پارلامەنت ءماجىلىسىنىڭ دەپۋتاتى اتاندى.

ونىڭ باسشىلىعىمەن اگروونەركاسىپتىك كەشەننىڭ ۆەدومستۆوارالىق عىلىمي-تەحنيكالىق كەڭەسى قۇرىلعانىن اتاپ وتكەن ءجون.