اۋىل اكىمدەرىنىڭ كورپۋسى 100 پايىز جاڭارتىلدى - ەرلان قارين

استانا. KAZINFORM - بۇل تۋرالى مەملەكەتتىك كەڭەسشى ەرلان قارين Telegram ارناسىنداعى پاراقشاسىندا جازدى.

- بەس جىل بۇرىن ساياسي رەفورمالار اياسىندا پرەزيدەنت قاسىم-جومارت توقايەۆ اۋىل اكىمدەرىن تىكەلەي سايلاۋ مەحانيزمىن ەنگىزۋ تۋرالى باستاما كوتەرگەن بولاتىن. سونىڭ ناتيجەسىندە، كەيىنگى جىلدارى اۋىل اكىمدەرىنىڭ كورپۋسى 100 پايىز جاڭارتىلدى. بارلىق 17 وبلىستا جالپى سانى 2969 اكىم سايلاندى. ولاردىڭ 864 ءى - ءوزىن-ءوزى ۇسىنعان ۇمىتكەرلەر، ال 283 ءى - ايەلدەر. جاڭا اكىمدەردىڭ باسىم بولىگى بۇرىن مەملەكەتتىك قىزمەتتە جۇمىس ىستەمەگەنىن ايتا كەتۋ كەرەك. حالىق سەنىمىنە يە بولعان ازاماتتاردىڭ قاتارىندا مۇعالىمدەر، دارىگەرلەر، شارۋالار، كاسىپكەرلەر، جەرگىلىكتى كاسىپورىندار مەن شارۋا قوجالىقتارىنىڭ باسشىلارى بار.

بۇگىندە اۋىل اكىمدەرىنىڭ ورتاشا جاسى - 44 جاس. سايلاۋ ناتيجەسىندە اۋىل اكىمدەرىنىڭ كورپۋسى جان-جاقتى جاڭارتىلدى. مەملەكەتتىك باسقارۋ جۇيەسىن جەتىلدىرۋ ۇدەرىسى جالعاسىپ جاتىر. بىلتىر بارلىق وڭىردە 45 اۋدان اكىمىن سايلاۋ پيلوتتىق رەجيمدە ءوتتى. ال بيىلدان باستاپ قازىرگى اۋدان مەن وبلىستىق ماڭىزى بار قالا اكىمدەرىنىڭ وكىلەتتىكتەرى اياقتالۋىنا قاراي سايلاۋ تىكەلەي داۋىس بەرۋ ارقىلى وتكىزىلەدى، - دەپ جازدى مەملەكەتتىك كەڭەسشى.

ەرلان قارين جازباسىن قورىتىندىلاي كەلە ەلىمىزدە ساياسي رەفورمالاردى جۇزەگە اسىرۋ ۇدەرىسى جالعاسىپ، مەملەكەتتىك قىزمەت سالاسىندا تۇبەگەيلى وزگەرىستەر جاسالىپ جاتقانىن اتاپ ءوتتى.

ەسكە سالا كەتەيىك، بۇعان دەيىن مەملەكەتتىك كەڭەسشى سۇيىكتى كىتاپتارىنىڭ ءتىزىمىن جاريالاعان بولاتىن.