ايجان ەسماعامبەتوۆا ەلدەگى كوروناۆيرۋستىڭ تارالۋى جايلى ايتتى

 دەنساۋلىق ساقتاۋ ۆيتسە-ءمينيسترى، مەملەكەتتىك باس سانيتار دارىگەر ايجان ەسماعامبەتوۆا ب ا ق وكىلدەرىنە ەلدەگى كوروناۆيرۋستىڭ تارالۋ دەڭگەيى تۋرالى مالىمەت بەردى، دەپ حابارلايدى Kazinform اگەنتتىگى. 

«ەلدەگى كوروناۆيرۋستىڭ تارالۋى تۋرالى ايتساق، احۋال بايىپتى. قىركۇيەك پەن قازاندا تامىزعا قاراعاندا ازعانتاي ءوسۋ بايقالدى. نەگىزى اپتاسىنا ورتا ەسەپپەن 100 گە دەيىن ۆيرۋس جۇقتىرۋ جاعدايى تىركەلەدى. بىلتىرعى وسى كەزەڭمەن سالىستىرساق، ارينە، سالىستىرۋعا كەلمەيدى. مىسالى، بىلتىر تامىز ايىندا 300 جاعداي، قىركۇيەكتە 500 جاعداي تىركەلگەن. ساندارعا قاراساق، احۋال بايىپتى ەكەنىن كورۋگە بولادى»، - دەدى ايجان ەسماعامبەتوۆا استانادا ءوتىپ جاتقان حالىقارالىق مەديتسينالىق كونفەرەنتسيا بارىسىندا.

ونىڭ سوزىنشە، قازاقستان اۋماعىندا كوروناۆيرۋستىڭ وميكرون شتامى عانا اينالىستا ءجۇر.

«قاي ۆيرۋس اينالىستا ءجۇر دەگەنگە كەلسەك، بۇكىل الەمدە وميكرون تاراپ كەتتى. وميكروننىڭ 600 دەي ءتۇرى بار. قازىر ءبىز ءوز ەلىمىزدەگى جاعدايعا، دۇنيەجۇزىلىك دەنساۋلىق ساقتاۋ ۇيىمى الەم بويىنشا قانداي ۆيرۋستىڭ كۇش الىپ، قاي ءتۇرى اۋىر ءوتىپ جاتقانىنا مونيتورينگ جۇرگىزىپ وتىرادى. بىزدەگى سوڭعى رەتتەۋ دەرەگى بويىنشا، وميكرون 100 پايىز اينالىستا ءجۇر. ونىڭ 25 پايىزى وميكروننىڭ «ەريس» دەيتىن ءتۇرى. بۇل الەمدە ءسال بۇرىنىراق پايدا بولعان جاڭا ءتۇر. قاتەلەسپەسەم، العاش رەت بيىل كوكتەمدە تىركەلگەن. قىركۇيەكتە الەمنىڭ 80 دەي ەلىنە تاراپ ۇلگەردى- دەدى ايجان ەسماعامبەتوۆا.