ايفون ءوندىرىسىن قىتايدان ءۇندىستانعا كوشىرۋى مۇمكىن

استانا. قازاقپارات - Apple كەلەسى جىلى ا ق ش-تا ساتىلاتىن iPhone قۇرىلعىلارىنىڭ جيناعىن قىتايدان ءۇندىستانعا كوشىرۋدى جوسپارلاپ وتىر، دەپ حابارلايدى NDTV.

Apple قىتايدان باس تارتىپ، iPhone ءوندىرىسىن ءۇندىستانعا كوشىرۋدى جىلدامداتۋى مۇمكىن. بۇل شەشىم، NDTV مالىمەتىنشە، ءۇندىستاننىڭ جابدىقتاۋ تىزبەگىن قانشالىقتى تەز دامىتا الاتىنىنا جانە قىتاي مەن ا ق ش اراسىنداعى ساۋدا كەلىسسوزدەرىنىڭ بارىسىنا بايلانىستى بولادى.

ا ق ش پرەزيدەنتى دونالد ترامپ Apple-گە قىتايمەن بايلانىستى ازايتۋ ءۇشىن قىسىم كورسەتىپ وتىر. ول جاقىندا قىتايمەن تاريفتەرگە قاتىستى كەلىسسوزدەر جالعاسىپ جاتقانىن راستادى. بۇل ارادا ءۇندىستانداعى Apple-دىڭ سەرىكتەس وندىرۋشىلەرى ءوندىرىس كولەمىن ارتتىرا باستادى.

Foxconn كومپانياسىنىڭ كارناتاكا شتاتىنىڭ بانگالور قالاسىنداعى زاۋىتى وسى ايدا ىسكە قوسىلادى دەپ كۇتىلىپ وتىر جانە ول تولىق قۋاتىندا جىلىنا 20 ميلليون قۇرىلعىعا دەيىن وندىرە الادى. سونىمەن قاتار Foxconn-نىڭ تاعى ءبىر ءىرى زاۋىتى تاميلناد شتاتىندا ورنالاسقان، ول Apple ونىمدەرىنىڭ حالىقارالىق جەتكىزىلىمىنىڭ شامامەن %50 ىن قامتاماسىز ەتەدى.

كومپانيانىڭ ەكسپورتى وتكەن قارجى جىلىمەن سالىستىرعاندا %40 دان استامعا ءوستى. بۇعان قوسا، ءۇندىستاندا iPhone ءوندىرىسى رەكوردتىق دەڭگەيگە جەتتى: سوڭعى ءبىر جىل ىشىندە 22 ميلليارد دوللارعا باعالاناتىن قۇرىلعىلار شىعارىلعان.

قازىرگى ۋاقىتتا ءۇندىستان Apple-دىڭ جاھاندىق iPhone ءوندىرىسىنىڭ شامامەن %20 ىن قۇراپ وتىر، بۇل ەلدىڭ موبيلدى تەحنولوگيا سالاسىنداعى ماڭىزدى ءرولىن ايعاقتايدى. ساراپشىلار بيىل Apple ءۇندىستانداعى جىلدىق ءوسىمىن %10-15 دەڭگەيىندە ساقتايدى دەپ بولجاپ وتىر.

بۇعان دەيىن ترامپ ەنگىزگەن تاريفتەرگە بايلانىستى Apple iPhone باعاسىن كوتەرۋى مۇمكىن ەكەنى حابارلانعان بولاتىن.