ايدالاداعى 500 مەتر: اقتوبەدە ءبىر ۇزىك جول جۇرگىزۋشىلەردىڭ اشۋىن تۋعىزدى
اقتوبە. KAZINFORM - اقتوبەدە نەبارى 500 مەتر بولاتىن جول بار. مەردىگەر بىلتىر باستاعان جۇمىسىن بيىل اياقتاۋى ءتيىس.
اقتوبە وبلىسى ايتەكە بي اۋدانىنداعى سارات-تۇمابۇلاق اۋداندىق ماڭىزى بار جولدىڭ نەبارى 500 مەترى جانە 1 شاقىرىمى سالىنعان. بيىل جوسپارداعى 24 شاقىرىم جول تۇگەل اياقتالۋى ءتيىس.
- جولدىڭ 48-60 جانە 60-72 شاقىرىمدارى ارالىعىنداعى ورتاشا جوندەۋ جۇمىستارى بىلتىر باستالعان. جوبا ەكى جىلعا قاراستىرىلعان. بىلتىر 24 شاقىرىمىنا تولىق نەگىزدەمەسىن توسەۋ جۇمىستارى ىستەلدى جانە ەكى ۋچاسكەدە 1 شاقىرىم جانە 500 مەتر اسفالت جابىندىسى توسەلىپ ۇلگەرگەن. جاقىن ارادا اسفالت توسەۋ جۇمىسى جالعاسادى. مەردىگەر كومپانيا تەحنيكالارىن 1-2 كۇندە اكەلەدى. اسفالتتاۋ جۇمىسىنىڭ قاراجاتى بيىلعا قارالعان جۇمىس ىستەلگەن سوڭ تولەنەتىن بولادى، - دەدى اقتوبە وبلىسى اكىمىنىڭ باسپا ءسوز قىزمەتى.
ايتا كەتەيىك، جولدىڭ 48-60 شاقىرىمى ارالىعىنا بىلتىر 376,7 ميلليون تەڭگە ءبولىنىپ يگەرىلدى، بيىل 353 ميلليون تەڭگە قاراستىرىلىپ وتىر. ال 60-72 ارالىعىنداعى جول ۋچاسكەسىنە بىلتىر 386,8 ميلليون تەڭگە بەرىلدى. بيىل 379,1 ميلليون تەڭگە جۇمسالادى. كەلىسىمشارت بويىنشا جول قۇرىلىسى قاراشا ايىندا دەيىن اياقتالۋى ءتيىس.
بۇعان دەيىن اقتوبەدەن رەسەي شەكاراسىنا دەيىنگى ارالىقتا بىرنەشە كولىك جولدا قالدى. جولدار قۇبىر سالۋ ءۇشىن ۋاقىتشا جابىلىپ، جاڭبىر جاۋعان كۇنى قاتىناس قيىنداعان ەدى.
بۇعان دەيىن اقتوبەدەن رەسەي شەكاراسىنا دەيىنگى ارالىقتا بىرنەشە كولىك جولدا قالدى. جولدار قۇبىر سالۋ ءۇشىن ۋاقىتشا جابىلىپ، جاڭبىر جاۋعان كۇنى قاتىناس قيىندادى.
اۆتور
التىناي ساعىندىقوۆا
