اياگوزدەگى قوزى كورپەش-بايان سۇلۋ كەسەنەسىنە اپاراتىن جولداعى كوپىر قيراپ تۇر
سەمەي. KAZINFORM - قوزى كورپەش-بايان سۇلۋ كەسەنەسى اباي وبلىسىنداعى اياگوز اۋدانىندا ورنالاسقان. كەسەنەگە اپارار جولداعى كوپىر كوكتەمنەن بەرى قيراپ تۇر.
اياگوز اۋدانى تارلاۋلى اۋىلدىق وكرۋگىندەگى قوزى كورپەش-بايان سۇلۋ كەسەنەسىنە اپاراتىن جولدا ورنالاسقان كوپىر 2014 -جىلى سالىنعان. مەردىگەر - «اردس» ج ش س. بيىلعى كوكتەمگى سۋ تاسقىنى كەزىندە كوپىر قيراپ قالدى.
«قازىرگى تاڭدا كوپىرگە تەحنيكالىق تەكسەرۋ جۇمىستارى جۇرگىزىلدى. جوندەۋدى قولعا الۋ ءۇشىن جوبالىق-سمەتالىق قۇجاتتاما ازىرلەنۋ ۇستىندە. كوپىردى قالپىنا كەلتىرۋ ماقساتىندا ءتيىستى جۇمىستار جۇرگىزىلەتىن بولادى»، - دەپ حابارلادى اياگوز اۋداندىق ىشكى ساياسات، مادەنيەت، تىلدەردى دامىتۋ جانە سپورت بولىمىنەن.
كوپىردى بولشەكتەۋ جۇمىستارى جەرگىلىكتى اتقارۋشى ورگان كۇشتەرىمەن ىسكە اسىرىلماق.
ايتا كەتەيىك، قوزى كورپەش-بايان سۇلۋ كەسەنەسى - 10-11-عاسىرلاردا تۇرعىزىلعان ساۋلەت ونەرى ەسكەرتكىشى. كەسەنە تۋرالى العاش رەت اكادەميك ي. پ. فالك 1771 -جىلى جازعان.
ەسكە سالساق، وسىعان دەيىن «سەمەي ورمانىنداعى» الاپات ورتتەن قازا بولعان ءورت سوندىرۋشىلەر مەن ورمانشىلارعا ەسكەرتكىش اشىلعانىن حابارلاعان ەدىك.
اۆتور
تالعاتجان مۇحامەتبەك ۇلى
