اياگوزدە مال ىزدەپ شىعىپ اداسىپ كەتكەن 8 جاسار بالانى تابۋعا بۇكىل ەل بولىپ جۇمىلدى
سەمەي. KAZINFORM - اباي وبلىسىندا پوليتسيا مەن قۇتقارۋشىلار اتقا ءمىنىپ، مال ىزدەپ كەتكەن 8 جاسار بالانى ىزدەپ تاپتى.
11-اقپاندا اياگوز اۋدانىنىڭ پوليتسيا بولىمىنە جەرگىلىكتى تۇرعىندار جۇگىنگەن. ولار 2015-جىلى تۋعان ۇلى مەرەي نۇرجان ۇلى يمانعاليدى ىزدەۋگە كومەك سۇراعان. بالا تاڭەرتەڭ اتپەن ۇيدەن شىعىپ كەتكەننەن قايتىپ ورالماعان. تۋىستارىنىڭ ايتۋىنشا، ساعات 10.00 شاماسىندا 8 جاسار بالا مال ىزدەپ اتقا مىنگەن. كەشكە كەلمەگەن سوڭ الاڭداعان اتا-اناسى ءوز بەتىنشە ىزدەپ تاپپاعان سوڭ پوليتسياعا جۇگىنەدى.
بالانى ىزدەۋ دەرەۋ باستالدى، 15 مينۋتتىڭ ىشىندە پوليتسيا ءبولىمىنىڭ بۇكىل جەكە قۇرامى كوتەرىلدى.
پوليتسەيلەردەن بولەك ەرىكتىلەر، جۇرتشىلىق جانە اۋداننىڭ قامقور تۇرعىندارى بەلسەندى قاتىستى. بالانى ىزدەۋ جۇمىسىن قولايسىز اۋا رايى دا قيىنداتتى.
ت ج م ىزدەستىرۋ-قۇتقارۋ جۇمىسىنا بارلىعى 74 ادام، ەكى درون، 17 تەحنيكا، 20 جىلقى جۇمىلدىرىلعانىن اتاپ ءوتتى. سونداي-اق، ت ج د قوسىمشا كۇشتەرى جىبەرىلدى.
بۇگىن تۇنگى 00:00 شاماسىندا بالا تابىلدى. ول اياگوز قالاسىنىڭ شەت جاعىنان تابىلدى، مەديتسينالىق كومەك قاجەت بولعان جوق.
اۆتور
جانات قاپالبايەۆا
