اتىراۋلىقتار پاريج وليمپياداسىنان ورالعان ءابيبا مەن ەسميگۇلگە كولىك سىيلادى

اتىراۋ. KAZINFORM - اتىراۋلىقتار پاريج وليمپياداسىنان ورالعان دزيۋدوشى ارۋلارعا كولىك سىيلادى.

بۇگىن اتىراۋعا پاريج وليمپياداسىنا باق سىناعان دزيۋدوشىلار ءابيبا ءابۋجاقىنوۆا مەن ەسميگۇل كۋيۋلوۆا ورالدى.

الەمدىك دودادا ءابيبا ءابۋجاقىنوۆا بەسىنشى ورىن العان ەدى. ال، ەسميگۇل كۋيۋلوۆا العاشقى بەلدەسۋىندە قارسىلاسىنان جەڭىلىپ قالدى. كەيىن كوماندالىق سايىستا دا قارسىلاسىنا ەسە جىبەردى.

«وليمپيادا - الەمنىڭ ەڭ مىقتى سپورتشىلارى سىنعا تۇسەتىن دودا. سول سەبەپتەن، بۇل سايىستا توپ جارۋ وڭاي ەمەس. وسى تۇرعىدان ايتقاندا، اتىراۋلىق دزيۋدوشىلارعا كىنا ارتۋدىڭ ءجونى جوق. كەرىسىنشە، وليمپيادا ەل نامىسىن قورعاعان سپورتشىلارىمىزعا قولداۋ ءبىلدىرىپ، جىگەرلەندىرگەن ءجون. اتىراۋ وبلىسىنىڭ جۇرتشىلىعى اتىنان دەمەۋشىلەر ءابيبا ءابۋجاقىنوۆا مەن ەسميگۇل كۋيۋلوۆاعا كولىك سىيلاۋدى ءجون كوردى»، - دەيدى رۋسلان جۇماعازيەۆ.

ونىڭ ايتۋىنشا، دەمەۋشىلەر وليمپيادان ورالعان دزيۋدوشىلارعا «Zeekr» اۆتوكولىگىن سىيعا تارتقان.

ەسكە سالا كەتەلىك، بۇعان دەيىن ءابيبا ءابۋجاقىنوۆا پاريج وليمپيادانىڭ قانداي ەكەنىن ۇعىندىرعانىن ايتقان ەدى.