اتىراۋلىق عالىمدار ۇشاق پەن جولدا مۇز قاتىرمايتىن رەاگەنت جاساپ شىعاردى

اتىراۋ. KAZINFORM - س. وتەبايەۆ اتىنداعى اتىراۋ مۇناي جانە گاز ۋنيۆەرسيتەتىنىڭ زەرتحاناسىندا سىلتىلىك ورتادا ناتري فورمياتىن الۋ ءادىسىن جۇزەگە اسىردى.

ۋنيۆەرسيتەتتىڭ باسپا ءسوز قىزمەتىنىڭ اقپاراتىنا سۇيەنسەك، عىلىمي جوباعا بەلگىلى حيميك، تەحنولوگ مارجان دوسماعامبەتوۆا جەتەكشىلىك ەتكەن. جاڭا رەاگەنتتى قىس مەزگىلىندە اۆتوكولىك پەن جاياۋ جۇرگىنشىلەر جولىن، ۇشاقتىڭ قاناتتارى مەن كورپۋسىن مۇزدان قورعاۋ ءۇشىن قولدانۋعا بولادى.

Фото: С.Өтебаев атындағы мұнай және газ университеті

«ناتري فورمياتىن ءوندىرۋ وسى كەزگە دەيىن پاللادي كاتاليزاتورى جانە ءتورت حلورلى كومىرتەكتى سۋتەگىمەن گيدروحلورلاۋ ءادىسى ارقىلى الىنىپ كەلدى. بۇل پروتسەسس 90-100 گردۋس تەمپەراتۋرادا 12-19 اتموسفەرالىق قىسىمدا سىلتىلىك ورتادا جۇرگىزىلەدى. ونىڭ باستى كەمشىلىگى قىسىم 12 اتموسفەراعا دەيىن تومەندەيدى. سول كەزدە ناتري فورمياتىنىڭ شىعىمى دا كۇرت تومەندەيدى. ال، جوعارىلاعان كەزدە تەحنولوگيالىق جابدىقتارعا جۇمسالاتىن مەتال شىعىنىن ارتتىرادى. بۇل ءوندىرۋ پروتسەسىن باسەكەگە قابىلەتسىز ەتىپ، باعاسىن قىمباتتاتادى»، - دەيدى ۋنيۆەرسيتەتتىڭ قاۋىمداستىرىلعان پروفەسسورى، حيميا عىلىمدارىنىڭ كانديداتى امانگەلدى ءابىلحايىروۆ.

ونىڭ ايتۋىنشا، ۋنيۆەرسيتەت زەرتحاناسىندا ءارتۇرلى كونسەنتراتسياداعى كۇيدىرگىش ناتريدىڭ سۋلى ەرتىندىسىنە سۋتەگىنىڭ اسقىن توتىعى ارالاستىرىلعان. كەيىن فورمالين قوسۋ ارقىلى ناتري فورمياتى الىندى.

«بۇل عىلىمي جوبانىڭ بىرنەشە ەرەكشەلىگى بار. بىرىنشىدەن، تەحنولوگيالىق جابدىقتار قاراپايىم تۇردە جاسالادى. ەكىنشىدەن، سول ارقىلى ءونىمنىڭ ارزانداۋىنا سەپتىگىن تيگىزەدى. ۇشىنشىدەن، قىس مەزگىلىندە مۇز قاتۋعا قارسى پايدالانعاندا، جولدىڭ سەمەنتبەتون جابىندىسىنا، كولىك شيناسىنا زاقىم كەلمەيدى. تورتىنشىدەن، كولىك كورپۋسىندا كورروزيا تۋدىرمايدى. ەڭ باستىسى، الىنعان قۇمىرسقا قىشقىل ناتريدى قولدانۋ ادامدارعا دا ، جول توسەمىنە دە زالالسىز جانە -15-تەن -25 گردۋس دەيىنگى تومەن تەمپەراتۋرادا جول توسەمىن تازالاۋعا مۇمكىندىك بەرەدى»، - دەيدى امانگەلدى ءابىلحايىروۆ.

اۆتور

جولداسبەك شوپەعۇل