اتىراۋدىڭ ماحامبەت اۋدانىندا جايىق ماڭىنداعى جىرالار اشىلىپ جاتىر

орал
Фото: Kazinform

اتىراۋ. KAZINFORM - اتىراۋ وبلىسىنىڭ ماحامبەت اۋدانىندا جايىق وزەنى ماڭىنداعى جىرالار اشىلىپ جاتىر.

ماحامبەت اۋداندىق ورمان جانە جانۋارلار دۇنيەسىن قورعاۋ جونىندەگى مەكەمە ديرەكتورى التىنبەك امانگەلدى ۇلىنىڭ ايتۋىنشا، ەلدى مەكەندەردى جايىق وزەنىنىڭ تاسقىن سۋىنان قورعاۋ ءۇشىن وسىنداي شەشىم قابىلدانعان.

«جايىق وزەنىنىڭ ماڭىندا ساي- جىرالار كوپ. وسى كەزگە دەيىن وزەن سۋىن بۇرۋ ءۇشىن 12 جىرا اشىلدى. قازىر قارت جايىق، ويىنكول، ءولىشىعاناق، بەساعاش، قورجىن، قوسوزەك، جۇماي، بەسقالا، الماعامبەت جانە باسقا ساي-جىرالارعا سۋ قۇيىلىپ جاتىر. وزەن سۋىنىڭ كوپ بولىگى ساي- جىرالارعا قۇيىلسا، ەلدى مەكەندەردى تاسقىن قاۋپىنەن قورعاپ قالۋعا بولادى. ازىرگە سۋدان ورمان شارۋاشىلىعىنا كەرى اسەر ەتەتىندەي زيان بايقالمايدى»، - دەيدى التىنبەك امانگەلدى ۇلى.

ونىڭ پىكىرىنشە، كەيىنگى جىلدارى سۋ تاپشىلىعىنان ورمان شارۋاشىلىعى اۋماعىندا قۋراعان اعاش كوبەيگەن. سول سەبەپتەن، ماحامبەت اۋدانىندا جىرالار قۋراعان اعاش قالدىقتارى مەن توپىراقتان تازارتىلعان.

ەسكە سالا كەتەلىك، بۇعان دەيىن اتىراۋدىڭ ماحامبەت اۋدانىندا جايىق وزەنىنىڭ جايىلماسىنا سۋ شىققانىن جازعان بولاتىنبىز.

اۆتور

جولداسبەك شوپەعۇل

سوڭعى جاڭالىقتار