اتىراۋدا ورتا عاسىرلاردا سالىنعان ۇيلەر تابىلدى
ارحەولوگتار سارايشىق قالاشىعىندا قازبا جۇمىستارىن جۇرگىزۋ بارىسىندا اتىراۋدان 50 شاقىرىم جەردە ورتا عاسىرلاردا سالىنعان ۇيلەردى تاپتى، - دەپ حابارلايدى AtyrauPress سايتى.
اتىراۋ وبلىستىق ولكەتانۋ مۇراجايىنىڭ عىلىمي قىزمەتكەرى ەرلان تىلەكقابىلوۆتىڭ ايتۋىنشا، قازبا جۇمىستارى 4-قىركۇيەكتە باستالعان.
«ارحەولوگيالىق قازبا جۇمىستارى كەزىندە ورتاعاسىرلىق ۇيلەردىڭ قابىرعالارى، تاندىر پەشتەرى، قىش ىدىستار، سۇيەك بۇيىمدارى جانە ورتاعاسىرلىق مونەتالار تابىلدى. بۇگىنگى تاڭدا 800 شارشى مەتر اۋماقتا قازبا جۇمىستارى جۇرگىزىلىپ جاتىر»، - دەدى تىلەكقابىلوۆ.
وبلىستىق تاريحي-ولكەتانۋ مۇراجايىنىڭ قىزمەتكەرلەرىنەن باسقا ەكسپەديتسيا قۇرامىنا جۇمىسسىز رەتىندە ەسەپتە تۇرعان اۋىل تۇرعىندارى دا بار.
«بارلىعى - 30 ادام. بولاشاقتا ولاردىڭ سانى ارتادى. ازىرگە تابىلعان ارتەفاكتىلەر تۋرالى عىلىمي تۇجىرىمدار جاسالمادى»، - دەيدى عىلىمي قىزمەتكەر.
