اتىراۋدا تۋدى قورلاعانداردىڭ ارتىندا تۇرعانداردى جازالاۋ كەرەك - باپي

استانا. KAZINFORM - ءماجىلىس دەپۋتات ەرمۇرات باپي باس پروكۋرور بەرىك اسىلوۆتىڭ اتىنا اتىراۋدا ارابشا جازۋى بار قازاقستان تۋىمەن سۋرەتكە تۇسكەن ازاماتتاردى ارانداتقانداردى جازاعا تارتۋدى سۇراپ، ساۋال جولدادى.

- جۋىردا عانا اتىراۋدا بولعان وعاش وقيعا قوعامدا ۇلكەن رەزونانس تۋعىزىپ، ازاماتتاردىڭ اشۋ-ىزاسىن تۋدىرىپ وتىر. بەت-اۋزىن تۇمشالاپ، قارا جامىلعان ءتورت ايەل مۇز ايدىنىندا وتكەن جارىس كەزىندە مەملەكەتتىك تۋدى ۇستاپ تۇسكەن سۋرەت الەۋمەتتىك جەلىلەرگە كەڭىنەن تاراپ كەتتى. ولاردىڭ قولىنداعى مەملەكەتتىك تۋدىڭ بەتىنە اراب جازۋى مەن ارابي قىلىشتىڭ سۇلبا-سۋرەتى سالىنعان. مۇندا ءبىزدىڭ نازارىمىزدى اۋدارعان - كوك تۋداعى اراب قارپىندەگى جازۋدىڭ وتە ساپالى تۇردە، ارنايى باسپا قۇرالىمەن تاڭبالانۋى. دەمەك، بۇل - جاي عانا تۇرمىستىق بۇزاقىلىق، ادەپسىز شەكتەن شىعۋشىلىق قانا ەمەس. بۇل - ءبىزدىڭ قوعامىمىزعا، مەملەكەتتىگىمىزگە، ۇلتتىق ءداستۇرىمىز بەن بىرەگەيلىگىمىزگە جاسالعان اشىق جانە ناقاق قارسىلىق، - دەيدى دەپۋتات.

ونىڭ پايىمداۋىنشا، مەملەكەتتىك تۋدى قورلاۋ - بۇكىل حالىقتى، تۇتاس مەملەكەتتى قورلاۋ.

- ەلدىڭ تۋىن ءبۇلدىرۋ ارقىلى جات پيعىلدى دارىپتەمەك بولعان بۇل ءتورت قىز الدەبىر ارانداتۋشى توپتىڭ قۇربانى بولۋى مۇمكىن. ولار جاستىق الاڭعاسارلىقپەن، الدە ماتەريالدىق قىزىعۋشىلىقپەن نەمەسە ءدىني ساۋاتسىزدىقپەن جاساعان بۇل ورەسكەل زاڭ بۇزۋشىلىقتىڭ تاساسىندا تۇرعان الدەبىر كەرەعار كۇشتەر بار سياقتى. مىنە، اكىمشىلىك تۇرعىداعى جازاسىن العان ءتورت قىزدان بۇرىن، وسى قىلمىستى ارەكەتتى ۇيىمداستىرۋشىلار جازاعا تارتىلۋى ءتيىس، - دەدى ەرمۇرات باپي.

سونداي-اق، ول مۇنداي ستاندارتقا ساي ەمەس تۋ Wildberries Russ ماركەتپلەيسىندە 5000 مىڭ تەڭگەدەن ساتىلىپ جاتقانىن ايتتى.

ەرمۇرات باپي قۇقىق قورعاۋ ورگاندارىن وسى وقيعانى ءجىتى تەكسەرىپ، ارانداتۋشىلىققا الدانعان ءتورت ايەلدىڭ ارتىندا تۇرعان كۇشتەردى، جالعان تۋدى دايىنداۋشىلاردى، ونى تاراتۋشىلاردى انىقتاپ، مۇنداي قاستاندىقتىڭ جولىن كەسۋ ءۇشىن، ۇيىمداستىرۋشىلارعا قاتاڭ جازا قولدانۋعا شاقىردى.

- بەكىتىلگەن ستاندارتقا سايكەس كەلمەيتىن، رەسمي سيپاتى بۇرمالانعان مەملەكەتتىك ءرامىزدى ساتۋعا شىعارعان ساۋدا ورىندارىنىڭ باسشىلىعىن جاۋاپقا تارتۋ كەرەك. ساتىلىپ كەتكەن تۋلاردى جيناپ الىپ، جويۋ قاجەت، - دەدى دەپۋتات.

بۇعان دەيىن مەملەكەتتىك تۋدى قورلاعان اتىراۋلىقتىڭ ءبىرى 15 تاۋلىككە قاماۋعا الىنعانىن جازعان ەدىك.

كەيىن مەملەكەتتىك تۋدى قورلاعان تاعى ءبىر جاس ءوسپىرىمنىڭ ءىسى قارالدى.

اۆتور

ەسىمجان ناقتىباي