اتىراۋدا ۇستىنە ەسكەرتكىش قۇلاعان 7 جاسار قىز قايتىس بولدى

происшествие
Фото: atpress.kz

اتىراۋ. KAZINFORM - اتىراۋدا 7 جاسار قىزدىڭ ۇستىنە ەسكەرتكىش قۇلادى. جاسوسپىرىم اۋرۋحانادا كوز جۇمدى.

اتىراۋ وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن ءمالىم ەتكەندەي، «جەڭىس» ساياباعىنداعى ەسكەرتكىشتىڭ قۇلاۋىنا كۇن رايىنىڭ كۇرت وزگەرگەنى اسەر ەتكەن. كەشە، 25-ماۋسىمدا كەشكى ساعات 21:40 شاماسىندا اتىراۋ قالاسىندا اۋا-رايى كۇرت وزگەرىپ، قاتتى جەل سوقتى. نوسەر جاۋدى.

«تۇنگى ساعات 00:40 شاماسىندا اتىراۋ قالاسىنداعى «جەڭىس» ساياباعىندا ورنالاسقان ەسكەرتكىش قۇلاپ، سالدارىنان ءبىر وتباسىنىڭ 2015 جانە 2017 -جىلى تۋعان بالالارى اتىراۋ وبلىستىق بالالار اۋرۋحاناسىنا ءتۇستى. اۋىر دەنە جاراقاتىن العان 7 جاسار قىز جانساقتاۋ بولىمىنە جاتقىزىلعان ەدى. الايدا، ول جاراقاتىنىڭ اۋىرلىعىنا بايلانىستى ءتيىستى ەم-شارالار كورسەتىلگەنىمەن، قايتىس بولدى. ال، 2015 -جىلى تۋعان جاسوسپىرىمنىڭ قولى سىنعان. وعان جاراقات تاڭۋ بەكەتىندە ەم كورسەتىلىپ، سىنىعى بار قولىنا گيپس سالىندى. امبۋلاتوريالىق ەم قابىلداۋ ءۇشىن ۇيىنە جىبەرىلدى»، - دەپ حابارلادى باسقارمانىڭ باسپا ءسوز قىزمەتى.

قازىر پوليتسيا قىزمەتكەرلەرى اتالعان دەرەككە قاتىستى تەرگەۋ امالدارىن جۇرگىزۋدى باستادى. سوت- مەديتسينالىق ساراپتاما تاعايىندالدى.

وزگە اقپارات تەرگەۋ مۇددەسىنە ساي جاريالاۋعا جاتپايدى.

اۆتور

جولداسبەك شوپەعۇل

سوڭعى جاڭالىقتار