اتىراۋدا 4 جاسار بالا بالاباقشانىڭ كارىز قۇدىعىنا قۇلاپ، مەرت بولدى

اتىراۋ. KAZINFORM - اتىراۋدا 4 جاسار بالا بالاباقشانىڭ كارىز قۇدىعىنا قۇلاپ، مەرت بولدى. قازىر اتالعان وقيعاعا بايلانىستى سوت-مەديتسينالىق ساراپتاما تاعايىندالدى.

وقيعا بۇگىن، 10-شىلدەدە اتىراۋ قالاسىنىڭ ماڭىنداعى قۇرساي اۋىلىندا بولعان.

كۇندىزگى ساعات 11:00 شاماسىندا «چەبۋراشكا» جەكە بالاباقشاسىندا 4 جاسار بالا كارىز قۇدىعىنا قۇلاپ كەتكەن. وقيعا ورنىنا قۇتقارۋ قىزمەتى مەن پوليتسيا شاقىرتىلعان.

اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، اتالعان وقيعاعا بايلانىستى كەشەندى تەرگەۋ جۇرگىزىلەدى.

«قازىر اتىراۋ قالالىق پوليتسيا باسقارماسىندا جەكە مەنشىك بالاباقشادا 4 جاسار بالانىڭ كارىز قۇدىعىنا قۇلاپ، قايتىس بولۋىنا قاتىستى قىلمىستىق ءىس تىركەلدى. پوليتسيا قىزمەتكەرلەرى كەشەندى تەرگەۋ امالدارىن جۇرگىزۋدى باستادى. سوت-مەديتسينالىق ساراپتاماسى تاعايىندالدى. وزگە اقپارات تەرگەۋ مۇددەسىنە سايكەس جاريالاۋعا جاتپايدى»، - دەپ حابارلادى دەپارتامەنتتىڭ باسپا ءسوز قىزمەتى.

ەسكە سالا كەتەلىك، بۇعان دەيىن اتىراۋدا ۇستىنە ەسكەرتكىش قۇلاعان 7 جاسار قىز قايتىس بولعانىن حابارلاعان ەدىك.