اتىراۋعا ۇلكەن سۋ كەلدى: جاس-كارى دەمەي بۇكىل حالىق بوگەت بەكىتۋگە جۇمىلدى
اتىراۋ. KAZINFORM - اتىراۋ وبلىسىندا جايىق وزەنىنىڭ كوتەرىلگەن سۋىن بوگەت ۇستاپ تۇر. وزەن سۋى يندەر اۋدانىنداعى كەيبىر ەلدى مەكەندەر تۇسىنداعى بوگەتكە تىرەلگەن.
يندەر اۋدانىنىڭ اكىمى دارىن شامۇراتوۆتىڭ ايتۋىنشا، ەلدى مەكەندەردى تاسقىن سۋدان قورعاۋ جۇمىسى كۇندىز دە، تۇندە دە جالعاسىپ جاتىر.
بۇگىن، 11-مامىر كۇندىزگى ساعات 12:00-دە جايىق وزەنىندەگى سۋ دەڭگەيى اۋدان ورتالىعى - يندەربور كەنتىنىڭ تۇسىندا 1027 سانتيمەترگە جەتتى.
بۇل قاۋىپتى شەكتەن +182 سانتيمەترگە كوپ.
وسىعان بايلانىستى وزەن جاعالاۋدى نىعايتۋ جۇمىستارى توقتاعان جوق.
ماسەلەن، قىزىلوردا وبلىستىق توتەنشە جاعدايلار دەپارتامەنتىنىڭ 51 قىزمەتكەرى يندەربور كەنتىندەگى بوگەتتى نىعايتىپ جاتىر.
دەپارتامەنتتىڭ باس مامانى قادىرجان بازاربەكتىڭ ايتۋىنشا، سىر ءوڭىرىنىڭ قۇتقارۋشىلار وتكەن تاۋلىكتە ينەرتتى ماتەريالدار تولتىرىلعان 8 مىڭ قاپ دايىندادى.
جايىق وزەنىنىڭ سۋى ساي-جىرالارعا قۇيىلىپ جاتىر. وزەننىڭ كەي تۇسىندا 7 مەترگە جۋىق جار وپىرىلىپ، كوممۋنالدىق سالانىڭ قىزمەتىنە كەدەرگى كەلتىردى.
«ماسەلەن، 7-مامىردا اققالا اۋىلىنداعى سۋ تازارتۋ قوندىرعىسىنىڭ ەلەكتر قۋاتىن بەرەتىن باعانا قۇلادى. سول كۇنى يندەربور كەنتىندە تاۋلىگىنە 2400 تەكشە مەتر سۋ بەرەتىن سۋ تازارتۋ قوندىرعىسىنىڭ ءبىرىنشى كوتەرىلىم قۇبىرى اعاش سالىندىلارىنىڭ كەدەرگىسىنەن ءۇزىلدى. سونىڭ سالدارىنان كەنتتەگى بولاشاق جانە شىعىس شاعىناۋداندارىنداعى 700 ابونەنتكە سۋ بەرۋ ۋاقىتشا توقتاتىلدى. سالا قىزمەتكەرلەرى سۋ تازارتۋ قوندىرعىسىنداعى اقاۋدى تۇنگى ساعات 00:00-دە قالپىنا كەلتىردى»، - دەيدى اۋدان اكىمى دارىن شامۇراتوۆ.
وزەن جاعالاۋىنداعى جاردىڭ قۇلاۋىنان بودەنە اۋىلىنداعى 110 ديامەترلىك اۋىز سۋ قۇبىرىنىڭ گيدرانت ورنالاسقان بەتوندى قۇدىعى مەن سۋ جەلىسىندە اقاۋ بايقالدى.
وعان قاجەتتى قۇرال-جابدىق اتىراۋ قالاسىنان اكەلىندى.
ال، ەلتاي اۋىلدىق وكرۋگىنىڭ قىزمەتكەرلەرى، اۋىل تۇرعىندارى مەن اۋداندىق بالىق ينسپەكتسياسىنىڭ ينسپەكتورلارى سۋ ورتاسىندا قالعان 80 گە جۋىق ءىرى قارانى قاۋىپسىز اۋماققا شىعاردى.
ويتكەنى، وزەن سۋى وسى ەلدى مەكەندەگى بوگەتكە تىرەلگەن.
قازىر ەلتاي اۋىلى مەن يندەربور كەنتىندە بوگەتتى بەكىتۋ، نىعايتۋ جۇمىسى ءجۇرىپ جاتىر. وعان توتەنشە جاعدايلار سالاسىنىڭ، اسكەر ءبولىمنىڭ ساربازدارى مەن تۇرعىندار اتسالىسىپ ءجۇر.
ال، كەشە تۇندە اتىراۋ- ورال تراسساسىنان يندەربور كەنتىنە بۇرىلاتىن 7 شاقىرىم جولدى سۋ باستى.
يندەر اۋدانىنىڭ اكىمى دارىن شامۇراتوۆتىڭ ايتۋىنشا، 1993-1994 -جىلدارى ءدال وسى جولدى سۋ شايعان.
«بۇل جولعا 8-مامىردان بەرى اتالعان جول بولىگىنىڭ جيەگىنە توپىراق توگىلىپ، بوگەت تۇرعىزىلعان ەدى. ءبىراق، كەشە جولدى ەكى جاعىنان جابۋعا تۋرا كەلدى. كولىك قوزعالىسىن تولىقتاي توقتاتتىق. ويتكەنى، جولعا 5-6 سايدان سۋ قۇيىلدى. جولدىڭ جيەگىنە توپىراق توگىپ، بوگەۋ جۇمىسىن جۇرگىزدىك. بۇگىن تاڭەرتەڭ كولىك قاتىناسىنا رۇقسات بەرىلدى»، - دەدى دارىن شامۇراتوۆ.
ەسكە سالا كەتەلىك، بۇدان بۇرىن سۋ تاسقىنىنا بايلانىستى اتىراۋ-ورال تراسساسىنان يندەربورعا باراتىن 7 شاقىرىم جول جابىلاتىنىن حابارلاعان ەدىك.
كەيىن اتىراۋ-ورال تراسساسىنان يندەربورعا باراتىن 7 شاقىرىم جولدى سۋ باستى.
اۆتور
جولداسبەك شوپەعۇل
