اتىراۋ وبلىسىندا 60 اۋىلدىڭ وقۋشىلارى مەكتەپكە تاسىمالدانادى

اتىراۋ. KAZINFORM - اتىراۋ وبلىسىندا 60 اۋىلدىڭ وقۋشىلارىن مەكتەپكە تاسىمالداۋ جوسپارلانىپ وتىر. وسى ماقساتقا 21 اۆتوبۋس ساتىپ الىنادى.

اتىراۋ وبلىستىق ءبىلىم بەرۋ باسقارماسى باسشىسىنىڭ ورىنباسارى ورىنتاي بيمانوۆانىڭ ايتۋىنشا، وقۋشىلارعا ورتا ءبىلىم بەرەتىن 204 مەكتەپ بار.

«بيىل 14700 وقۋشى ءبىرىنشى سىنىپقا قابىلدانادى. مەكتەپ تابالدىرىعىن العاش اتتايتىن وقۋشىلاردىڭ %85- ى قازاق سىنىبىن تاڭداپ وتىر. ال، %15 ورىس سىنىبىندا وقۋدى كوزدەگەن. وڭىردەگى مەكتەپتەردە 58 600 وقۋشى ىستىق تاماقپەن قامتىلادى»، - دەدى ورىنتاي بيمانوۆا.

ونىڭ دەرەگىنە قاراعاندا، جىلىوي اۋدانىندا سۋ تاسقىنىنان 10 مەكتەپ زارداپ شەككەن. قازىر 7 ءبىلىم ورداسىنا ورتاشا، 1 مەكتەپتە كۇردەلى جوندەۋ جۇمىسى باستالعان. بۇل اۋداندا جاڭادان 2 مەكتەپ سالىنادى.

«وبلىستا ەرەكشە ءبىلىم بەرۋدى قاجەت ەتەتىن 7385 وقۋشى تىركەلىپ وتىر. ال، 60 ەلدى مەكەندەگى 5821 وقۋشى ءبىلىم ورداسىنا تاسىمالدانادى. بۇل ءۇشىن 21 اۆتوبۋس ساتىپ الىنادى»، - دەپ ءمالىم ەتتى ورىنتاي بيمانوۆا.

اۆتور

جولداسبەك شوپەعۇل