اتىراۋ وبلىسىنان 28 جىل بۇرىن اسكەرگە اتتانعان جىگىت الماتى وبلىسىنان تابىلدى
اتىراۋ. KAZINFORM - اتىراۋ وبلىسىنان 28 جىل بۇرىن اسكەرگە اتتانعان جىگىت الماتى وبلىسىنان تابىلدى.
بۇل دەرەكتى قىزىلقوعا اۋداندىق ءماسليحاتىنىڭ دەپۋتاتى ەسەنباي نۇروۆ راستادى.
«ءبىزدىڭ اۋدانداعى ويىل اۋىلدىق وكرۋگىنىڭ ورتالىعى - جاسقايرات اۋىلىنان بەيبىت قوزىبايەۆ 1996-جىلعى كۇزدە اسكەرگە شاقىرىلعان ەدى. سول كەزدە مەن اۋداندىق قورعانىس ىستەرى جونىندەگى ءبولىمنىڭ باسشىسى ەدىم. ول باستاپقىدا باتىس قازاقستان، كەيىن ماڭعىستاۋ وبلىسىنداعى اسكەري بولىمدە بورىشىن وتەگەن. ءبىراق، كەيىن وتباسىنا ورالماي، حابار-وشارسىز كەتتى. ونىڭ مۇنداي قادامعا نە سەبەپتەن بارعانى بەلگىسىز. اناسى مارجان اپاي اۋداندىق قورعانىس ىستەرى جونىندەگى بولىمگە اي سايىن كەلىپ، ۇلىنىڭ حابارىن ءبىلىپ بەرۋدى ءجيى سۇرايتىن ەدى. بالاسىن ءبىر كورۋدى اڭساعان انا «بارمىسىڭ، باۋىرىم» باعدارلاماسى ارقىلى دا ىزدەۋ سالدى»، - دەيدى ەسەنباي نۇروۆ.
ونىڭ ايتۋىنشا، 28 جىل بۇرىن اسكەرگە اتتانعان بەيبىت قوزىبايەۆ 1977-جىلى تۋعان. جاقىندا ول سىنىپتاستارىمەن TikTok جەلىسى ارقىلى بايلانىسقا شىققان.
«بۇل جاڭالىققا ءبارىمىز قۋاندىق. اسىرەسە، اناسىنىڭ، تۋىستارىنىڭ قۋانىشىندا شەك جوق. ونى اسكەرگە شاقىرعان مەنىڭ دە موينىمنان اۋىر جۇك تۇسكەندەي بولدى. قازىر بەيبىت قوزىبايەۆ الماتى وبلىسىنداعى بايسەركە اۋىلىندا تۇرادى ەكەن. ۇيلەنگەن، 4 بالاسى بار. وسى كەزگە دەيىن حابار-وشارسىز جۇرگەنى ءۇشىن بەيبىتتى كىنالاۋدىڭ ءجونى جوق. ومىردە ءتۇرلى جايت بولۋى مۇمكىن. ەڭ باستىسى، ول امان-ەسەن تابىلدى. اناسى مارجان اپاي بايسەركە اۋىلىنا بارىپ، ۇلىمەن كەزدەستى. بەيبىتتى ماڭدايىنان يىسكەپ، قۇشاعىنا باستى. سارعايعان ساعىنىشىن باستى»، - دەيدى ەسەنباي نۇروۆ.
اۆتور
جولداسبەك شوپەعۇل
