اتىراۋ مۇناي وڭدەۋ زاۋىتىنىڭ ماڭىندا اۋا ساپاسى كۇنى-ءتۇنى تەكسەرىلىپ جاتىر
اتىراۋ. KAZINFORM - اتىراۋدا مۇناي وڭدەۋ زاۋىتىنىڭ ماڭىندا اۋا ساپاسىنا مونيتورينگ جۇرگىزۋ باستالدى. اۋا ساپاسىن تەكسەرۋ 7 -مامىرعا دەيىن جالعاسادى.
اتىراۋ وبلىستىق ەكولوگيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، «اتموسفەرالىق اۋانى قورعاۋ جونىندەگى رەسپۋبليكالىق عىلىمي-زەرتتەۋ ورتالىعى» ج ش س ماماندارى 26 -ساۋىردە مونيتورينگ جۇرگىزۋگە كىرىسكەن.
- بۇل مونيتورينگ «ا م ءو ز» ج ش س- ءنىڭ سانيتاريالىق- قورعاۋ ايماعىنىڭ ناقتى شەكاراسىن بەلگىلەۋ ماقساتىندا قولعا الىندى. زاۋىتتىڭ وندىرىستىك الاڭىنىڭ ەسەپتىك سانيتاريالىق- قورعاۋ ايماعىنىڭ شەكاراسىندا، تۇرعىن ۇيلەر ورنالاسقان اۋماقتان تىس 8 باعىت بويىنشا اتموسفەرالىق اۋانى جانە فيزيكالىق فاكتورلاردى زەرتتەۋ ءۇشىن مونيتورينگتىك جۇمىسى جۇرگىزىلىپ جاتىر. ەڭ نەگىزگى ماقسات - قورشاعان اۋاداعى لاستاۋشى زاتتاردىڭ قۇرامىن تابيعي زەرتحانالىق زەرتتەۋلەر جۇرگىزۋ جانە اتموسفەرالىق اۋاعا فيزيكالىق اسەر ەتۋ دەڭگەيىن ولشەۋ ارقىلى سانيتاريالىق- قورعاۋ ايماعىنىڭ ەسەپتىك شەكاراسىنىڭ ولشەمىن راستاۋ، - دەپ حابارلادى دەپارتامەنتتىڭ باسپا ءسوز قىزمەتى.
اۋا ساپاسىنا مونيتورينگ جۇمىسى كۇندىزگى جانە تۇنگى مەزگىلدە جۇرگىزىلەدى.
ەسكە سالا كەتەلىك، بۇعان دەيىن اتىراۋ مۇناي وڭدەۋ زاۋىتىنىڭ قوندىرعىسىنان قارا ءتۇتىن بۋداقتاعانىن حابارلاعان بولاتىنبىز.
