اتىراۋ گارنيزونىنىڭ اسكەريلەرى قۇلسارىعا جەتۋ ءۇشىن 200 شاقىرىمدى جاياۋ ءجۇردى

اتىراۋ. KAZINFORM - اتىراۋ گارنيزونىنىڭ 175 اسكەري قىزمەتشىسى تاسقىن سۋ باسقان جىلىوي اۋدانىنىڭ ورتالىعى - قۇلسارى قالاسىنا 200 شاقىرىمدى جاياۋ ءجۇرىپ كەلدى.

قۇلسارى قالاسىنا اتىراۋ گارنيزونىنىڭ №41433، 41321 جانە 21642 اسكەري ءبولىمىنىڭ اسكەري قىزمەتشىلەرى كەلدى.

№41433 اسكەري ءبولىمىنىڭ روتا كومانديرى، كاپيتان رامازان ودينايەۆتىڭ ايتۋىنشا، جەكە قۇرام تاسقىن سۋ باسقان «دوسسور- قۇسلارى» باعىتىنداعى جولدى اينالىپ وتكەن. بۇل ءۇشىن 200 شاقىرىمدى جاياۋ جۇرۋگە ءماجبۇر بولعان.

«قۇلسارى قالاسىن تاسقىن سۋدان قورعاۋ ماقساتىنداعى جاعالاۋدى نىعايتۋ جۇمىستارىنا كومەكتەسۋ ءۇشىن قوسىمشا جەكە قۇرام جىبەرىلدى. اسكەري قىزمەتشىلەر تاڭعى ساعات 06:00-07:00 گە 1 مىڭنان استام قاپقا توپىراق تولتىرىپ، بوگەتكە توسەدى. قازىر بۇل جۇمىسقا جىلىوي اۋدانىندا 200 دەن استام اسكەري قىزمەتشى جۇمىلدىرىلدى»، - دەيدى روتا كومانديرى رامازان ودينايەۆ.

ال، كەشە، 6-ساۋىردە جىلىوي اۋدانىنداعى جەم وزەنىندە جاساندى بوگەتتەردى بۇزۋ باستالدى. ونى «باتىس» وڭىرلىك قولباسشىلىعىنا قاراستى ينجەنەرلىك قىزمەتىنىڭ وفيتسەرلەرى جۇرگىزدى. سونىڭ ناتيجەسىندە وزەن سۋىنىڭ ارناسىن بۇرۋعا جول اشىلدى.

ەسكە سالا كەتەلىك، بۇدان بۇرىن اتىراۋ وبلىسىندا توتەنشە جاعداي جاريالانعان ەدى.

سونداي-اق اتىراۋ وبلىسىنىڭ ءبىلىم بەرۋ مەكەمەلەرىندە ساباق وفلاين فورماتتا جالعاساتىنىن جازعان بولاتىنبىز.

اۆتور
جولداسبەك شوپەعۇل