ۆاتيكانداعى تاريحي كونسەرت: الەمدىك جۇلدىزدار جانە درون شوۋى
استانا. KAZINFORM - ۆاتيكانداعى اۋليە پەتر الاڭىندا العاش رەت ەسترادالىق كونسەرت ءوتىپ، ەۋروپاداعى ەڭ ۇلكەن درون شوۋى ۇيىمداستىرىلدى، دەپ حابارلايدى National Geographic.
Grace for the World كونسەرتىندە يتالياندىق تەنور اندرەا بوچەللي، امەريكالىق ءانشى فاررەلل ۋيليامس جانە باسقا دا تانىمال ارتىستەر ونەر كورسەتتى.
كونسەرت 2025 -جىلعى «ادامزات باۋىرلاستىعى 2025» دۇنيەجۇزىلىك كەزدەسۋىن اياقتادى.
ءىس-شارادا بۇدان باسقا بىرنەشە مىڭ درون اۋەدە ءۇش ولشەمدى جۇرەكتى، بەيبىتشىلىك كوگەرشىندەرى بەينەسىن جاساپ جانە مارقۇم ريم پاپاسى فرانسيسكتىڭ پورترەتىن جاڭعىرتتى.
ءارقايسىسىنىڭ سالماعى نەبارى 350 گرامم بولاتىن دروندار 16 ميلليون ءتۇستى جاڭعىرتا الادى. بۇل - يلون ماسكتىڭ ءىنىسى، باس ديرەكتور كيمبال ماسكتىڭ تۋىندىسى. ول 2024 -جىلدىڭ باسىندا، ريم پاپاسى فرانسيسكتىڭ ءتىرى كەزىندە جارىق شوۋ جاساۋ يدەياسىمەن ۆاتيكانعا العاش رەت كەلگەن ەدى. كيمبال ماسكتىڭ كومانداسى جوبانى ۇيلەستىرۋگە، رۇقساتتاردى الۋعا جانە باعدارلامانى ازىرلەۋگە 18 اي جۇمسادى.
الاڭدا شوۋدى قورعانىس ءمينيسترى گيدو كروزەتتو مەن ريم ءمەرى روبەرتو گۋالتيەري تاماشالادى. ءىس- شاراعا بارلىعى 80 مىڭنان استام ادام قاتىستى.
وسىعان دەيىن قىتايدا ۇيىمداستىرىلعان الىپ درون شوۋى گيننەستىڭ رەكوردتار كىتابىنا ەنگەنى تۋرالى جازدىق.
The most extraordinary drone display over the Vatican - including an image of Pope Francis for which the crowd went wild pic.twitter.com/x9kgF5kpXp
— James Longman (@JamesAALongman) September 13, 2025
