اتىشۋلى بلوگەر پەريزات قايرات ىسىنە گولوۆكيننىڭ قاتىسى قانشا؟
استانا. KAZINFORM - سوت پروتسەسىندە GGG- ءدىڭ 10 ميلليون تەڭگەلىك قولعاپتارى ءسوز بولدى
استانادا پەريزات قايراتقا قاتىستى قىلمىستىق ءىس بويىنشا سوت وتىرىسى جالعاسىپ جاتىر. ءىس ماتەريالدارىندا قايىرىمدىلىق اۋكسيونى قارالدى.
سوتتا سول اۋكسيوندا جابىرلەنۋشى، «MM Group Development» ج ش س- ءنىڭ ديرەكتورى ءمولدىر ءسۇيىنشالىنىڭ گەننادي گولوۆكيننىڭ بوكس قولعاپتارىن 10 ميلليون تەڭگەگە ساتىپ العانى، الايدا بۇل قاراجاتتى كەيىن قايراتتىڭ ءوزى العانى ايتىلدى. الايدا قورعاۋ تاراپى لوتتىڭ قۇنىنا كۇمان كەلتىردى.
پەريزات قايراتتىڭ ادۆوكاتتارى قولعاپتىڭ ناقتى قۇنىنا كۇمان كەلتىرىپ، جابىرلەنۋشىدەن سۇراق-جاۋاپ كەزىندە بۇل تولەمنىڭ ءمان-ماعىناسىن ناقتىلاۋعا تىرىستى.
«ءسىز گولوۆكيننىڭ قولعاپتارىن 10 ميلليون تەڭگەگە ساتىپ الدىڭىز با؟ سول ءۇشىن بىردەڭە الدىڭىز با؟» - دەپ سۇرادى قورعاۋشىلار.
ءمولدىر ءسۇيىنشالى بۇل سومانى قولعاپتى ساتىپ الۋ ءۇشىن ەمەس، قايىرىمدىلىق جوباسىن قولداۋ ماقساتىندا بەرگەنىن ايتتى:
«مەن بۇل اقشانى ناۋقاس بالالارعا ارنالعان ورتالىق قۇرىلىسىنا كومەك رەتىندە بەردىم. قولعاپ ءۇشىن ەمەس»، - دەپ ناقتىلادى ول.
جابىرلەنۋشى اۋكسيوننىڭ قايىرىمدىلىق سيپاتى بولعانىن جانە اقشانىڭ وڭالتۋ ورتالىعىن سالۋعا جۇمسالۋى ءتيىس ەكەنىن ەرەكشە اتاپ ءوتتى.
«قاراجاتتى رەسمي تۇردە اۋداردىق. الايدا ۋاقىت وتە كەلە ورتالىق سالىندى ما، اقشا ءوز ماقساتىنا جەتتى مە دەگەن سەكىلدى سۇراقتار تۋىنداي باستادى. جوبانىڭ تاعدىرى جايلى ەشقانداي اقپارات الا المادىم. تەرگەۋگە دەيىنگى كەزەڭدە 10 ميلليون تەڭگەنى قايتارۋ تۋرالى ازاماتتىق تالاپ ارىز بەردىم. ەگەر بۇل قاراجات ورتالىق سالۋعا جۇمسالعان بولسا، شاعىم بەرمەۋشى ەدىم. ءبىراق ەگەر ول قاراجات قورعا جەتپەسە، وندا قاراجاتتى قايتارۋدى ادىلەتتى دەپ ەسەپتەيمىن»، - دەدى ول سوتتا.
ايىپتاۋ اكىسىنە سايكەس، پەريزات قايرات پەن اناسى عايني الاشبايەۆا 2021-جىلدىڭ قاراشاسىندا Sheraton قوناقۇيىندە قايىرىمدىلىق اۋكسيونىن ۇيىمداستىرعان. ءىس-شارا بارىسىندا 21,6 ميلليون تەڭگە جينالعان، ونىڭ ىشىندە 10 ميلليونى - «MM Group Development» ج ش س- نەن. پروكۋراتۋرا بۇل قاراجات ناقتى ماقساتقا ەمەس، جەكە قاجەتتەرگە، اتاپ ايتقاندا، دۋبايداعى ليۋكس قوناقۇيلەردە تۇرۋعا، برەندتىك كيىمدەر ساتىپ الۋعا جانە باسقا دا ءسان-سالتاناتقا جۇمسالعان دەپ مالىمدەيدى.
