اتى-ءجونى ولىلەردىڭ تىزىمىنە ەنىپ كەتكەن ستۋدەنت الماتىدا 15 كۇن بۇرىن بولعان

حوستەلدەگى ءورت كەزىندە قازا تاپتىعا بالانىپ، اتى-ءجونى ولىلەردىڭ تىزىمىنە ەنىپ كەتكەن سارىاعاشتىق جەتكىنشەكتىڭ اكەسى بولعان جايدى بايانداپ بەردى، دەپ حابارلايدى Kazinform.

ءامىرالى رامازان الماتىعا ءبىر كۇنگە قوناققا بارعان. سودان جاتاتىن جەر بولماعان سوڭ، حوستەلدىڭ قىزمەتىنە جۇگىنىپتى. بۇل تۋرالى Kazinform سايتىنىڭ تىلشىسىنە ونىڭ اكەسى ايتتى.

«بالام 15 كۇن بۇرىن الماتىعا قوناققا باردى. بارعان كۇننىڭ ەرتەڭىنە قايتىپ كەلدى. سودان دەنساۋلىعى سىر بەرىپ جۇرگەندىكتەن تاشكەنتكە الىپ بارىپ، دارىگەرلەرگە كورسەتىپ قايتتىم. قازىر ۇيدە ەم قابىلاپ جاتىر. اللاعا شۇكىر امان-ەسەن. ال، اتى-ءجونىنىڭ قايتىس بولعاندار تىزىمىنە ەنىپ كەتۋى - سول جەردەگى مامانداردىڭ كىناسى. ەشكىم تەكسەرمەگەن. بۇكىل ءتىزىمدى بەرە سالعان بولۋى كەرەك، ىشىندە مەنىڭ 15 كۇن بۇرىن بارىپ، ءبىر كۇن جاتىپ كەتكەن ۇلىمنىڭ دا اتى-ءجونى ءجۇر» - دەيدى اكەسى باتىرالى بەكقۇلوۆ.

سونداي-اق رامازاننىڭ اكەسى اقپاراتتىق كەڭىستىكتە تاراپ جاتقان جالعان اقپاراتتاردىڭ سالدارى بالاسىنىڭ وقۋىنا كەرى اسەر ەتىپ جاتقانىن مالىمدەدى.

«مەنىڭ بالام شىمكەنتتە وقيدى. بيىل ديپلوم الۋى كەرەك ەدى، قازىر ۇستازدارى وقۋدان شىعارماق بولىپ جاتىر ەكەن. بالام جۇمىس ىستەۋگە ەمەس، قوناققا باردى. ءبىر كۇنگە. سودان بەرى ەمدەلىپ جاتىر. ۇيىمىزدە تاشكەنتكە بارىپ-كەلگەن قاعازدارىمىز، ونداعى دارىگەرلەردىڭ نۇسقامالارى دا ساقتاۋلى تۇر. وقۋ ورنىنىڭ باسشىلىعى مەن ۇستازدارى تۇسىنىستىكپەن قاراسا دەيمىن» - دەيدى ول.

ايتا كەتەيىك، حوستەلدەگى ورتتەن قازا تاپقان بەيبارىس الدىبەك قازىعۇرت اۋدانىندا جەرلەندى. ول نەبارى 20 جاستا ەدى.

ەسكە سالايىق، 30-قاراشا كۇنى الماتىدا حوستەل ورتەنىپ، 13 ادام قازا تاپتى.

ورتتەن زارداپ شەككەن ادامدار قالالىق جەدەل شۇعىل كومەك كورسەتۋ اۋرۋحاناسىنا جەتكىزىلدى. قالالىق دەنساۋلىق ساقتاۋ باسقارماسىنىڭ مالىمەتىنە سايكەس، ناۋقاستىڭ بىرىنە كومىرقىشقىل گازىنان ۋلانۋ دياگنوزى قويىلدى.

ءورت شىققان «الماتى حوستەل» Halyk Bank مەنشىگىندەگى عيماراتتا ورنالاسقانى بەلگىلى بولدى. قازاق تاپقانداردىڭ توعىزى - قازاقستاندىق، قالعانى شەتەلدىكتەر ەكەنى انىقتالدى. كەيىن حوستەلدە تۇرىپ جاتقان ستۋدەنتتەر ءورت باستالعان كەزدە عيماراتتان قالاي شىققانىن ايتىپ بەردى.

سونداي-اق حوستەلدىڭ يەسى - «ك ۋ س ا حالىك» ج ش س. ونى جالعا العان - «ALA Hostel» ج ش س. جالداۋ تۋرالى كەلىسىمشارت بيىل 21-قىركۇيەكتە جاسالعانى انىقتالدى.

اۆتور

قايرات زاينيشەۆ