اۆتورلىق قوعامدار كومپوزيتورلاردىڭ قۇقىعىن بۇزىپ وتىر - دەپۋتات

استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات نارتاي سارسەنعاليەۆ اۆتورلىق قوعامدارعا قاتىستى ماسەلەنى كوتەردى.

ايتا كەتەيىك، پالاتانىڭ وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زياتكەرلىك مەنشىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا تالقىلانىپ جاتىر.

- ەلىمىزدە 15 اۆتورلىق قوعام بار. ءبىراق ولار اۆتورلاردىڭ قۇقىعىن وتە قاتتى بۇزىپ وتىر. ماسەلەن، اۆتوردىڭ شىعارماسى ورىندالادى جانە سول ءۇشىن اۆتورلىق قوعامعا اقشا تۇسەدى. وسى اقشانىڭ 70 پايىزى اتالعان قوعامدا قالسا، 30 پايىزى اۆتوردىڭ وزىنە بارادى. ناقتى دەرەككە توقتالساق، 2023 -جىلى ۇجىمدىق اۆتورلىق باسقارۋ ۇيىمدارىنا ەلىمىزدە 1 ميلليارد 550 ميلليون تەڭگە تۇسكەن. سونىڭ ىشىندە 439 ميلليون تەڭگەسى عانا اۆتورلارعا بارعان، ياعني ۇشتەن ءبىر بولىگى. ءدال وسى زاڭسىزدىقتى قاشان تۇزەيسىزدەر؟ ويتكەنى، ءشامشى قالداياقوۆتىڭ 55 ءانىن ورىنداعانى ءۇشىن اۆتورلىق قوعامدار ءۇش ايدا كومپوزيتوردىڭ ۇرپاعىنا 22 مىڭ تەڭگە تولەگەن، قازىر ول سوما 18 مىڭ تەڭگەگە ءتۇسىپ كەتتى. ەكىنشىدەن، وسى زاڭنىڭ 39-بابىنا قاراساق، فونوگراممانى ەفيرگە بەرگەندەر جانە سول فونوگراممانى رەترانسلياتسيا جاساعاندار ەندى فونوگراممانى جاساۋشىلار مەن ورىنداۋشىلارعا تاعى سىياقى تولەۋ كەرەك دەپ كورسەتىلگەن. دەپۋتاتتار فونوگراممانى جويۋ كەرەك دەپ كۇرەسىپ وتىر. ال سىزدەر سىياقى تولەۋدى قامتىعانسىزدار. بۇل قالاي بولعانى؟! وسى تەتىك فونوگراممانى جاساۋشىلاردى ودان ءارى جاساندى مۋزىكاعا يتەرمەلەيدى، - دەدى ن. سارسەنعاليەۆ.

ءوز كەزەگىندە ادىلەت ءمينيسترى ەرلان سارسەمبايەۆ بۇل ماسەلە وتە كۇردەلى ەكەنىن راستادى.

- وسى ماسەلەنى شەشۋ ءۇشىن ەكى قادام كەرەك. بىرىنشىدەن، زاڭگەرلىك جاعىنان ءتيىستى زاڭدارعا وزگەرىس ەنگىزۋ كەرەك. ەكىنشىدەن، ۇيىمداستىرۋ جاعىن قامتۋ قاجەت. ءبىز ءتيىستى پلاتفورمانى ازىرلەپ جاتىرمىز، ونى كۇزگە دەيىن دايارلايمىز. بۇگىن ماجىلىستە قارالىپ جاتقان زاڭ جوباسى تولىق قابىلدانىپ، پرەزيدەنت قول قويعانعا دەيىن ادىلەت مينيسترلىگى ۇيىمداستىرۋ جاعىن قامتاماسىز ەتەدى دەپ سانايمىن. وسى ورايدا اتالعان ماسەلەگە قاتىستى ءتيىستى شەشىم جاسالادى. ال فونوگرامما ماسەلەسىنە توقتالسام، زاڭ جوباسىن ەكىنشى وقىلىمعا دەيىن جۇمىس توبىنىڭ وتىرىسىندا پىسىقتاۋعا مۇمكىندىك بار، - دەدى ادىلەت مينيستر.

ەسكە سالساق، بىلتىر كۇزدە ماجىلىستە كەراتيۆتى يندۋستريانى دامىتۋ جونىندە ءوتىپ جاتقان جيىندا اۆتورلىق قۇقىق سالاسىنداعى ساراپشى تەمىرلان تولەگەنوۆ شىعارماشىلىق ادامدارى ءوز تالانتىن اقشاعا اينالدىرۋعا يكەمسىز ەكەنىن ايتتى.

اۆتور

رۋسلان عابباسوۆ