اۆتورلىق قۇقىقتى بۇزۋ بابىمەن 3 قىلمىستىق ءىس قوزعالدى

ەلىمىزدە اۆتورلىق قۇقىقپەن بايلانىستى سوتتا قارالعان ىستەردىڭ سانى ازايىپ، وندىرىلگەن سومانىڭ كولەمى ارتقان، دەپ حابارلايدى قازاقپارات.

بۇل تۋرالى ادىلەت مينيسترلىگى زياتكەرلىك مەنشىك قۇقىعى دەپارتامەنتىنىڭ ديرەكتورى شولپان ابدىرەيەۆا رەداكتسيانىڭ ساۋالىنا بەرگەن جاۋابىندا ايتتى.

«قۇقىقتىق ستاتيستيكا جانە ارنايى ەسەپكە الۋ ورگاندارىنىڭ پورتالىنداعى اقپارات بويىنشا، 2022 -جىلى سوتقا اۆتورلىق جانە ساباقتاس قۇقىقتار ماسەلەسىمەن بايلانىستى 309 ارىز ءتۇستى. (2020 ج. – 323، 2021 ج. - 355).

ونىڭ ىشىندە 225 ارىز بويىنشا ءىس قوزعالىپ، (2020 ج. – 261، 2021 ج. - 266)، 115 ءىس بويىنشا شەشىم شىعارىلعان (2020 ج. – 185، 2021 ج. - 142)»، - دەپ جازىلعان جاۋاپتا.

مينيسترلىكتىڭ مالىمەتى بويىنشا، سوتتا قارالعان ىستەردىڭ سانى قىسقارعانىمەن، ءوندىرىپ الۋعا جاتقىزىلعان سومالاردىڭ كولەمى ارتقان.

«سوتتار اتالعان ىستەر بويىنشا جالپى سوماسى 125 ميلليون 774 مىڭ 69 ت گ تەڭگە ءوندىرىپ الىپ تۋرالى شەشىم شىعارعان (2020 ج. - 89652240 ت گ، 2021 ج. - 33789160 ت گ)»، - دەلىنگەن جاۋاپتا.

ۆەدومستۆونىڭ اقپاراتىنا سۇيەنسەك، جىل باسىنان بەرى اۆتورلىق جانە ساباقتاس قۇقىقتاردى بۇزۋ فاكتىسى بويىنشا 3 قىلمىستىق ءىس (قىلمىستىق كودەكسىنىڭ 198-بابى) تىركەلگەن.