اتوم ەلەكتر ستانسياسىنان كومىرقىشقىل گاز شىعىندىلارى جوق - مامان

استانا. KAZINFORM - استانادا ەلىمىزدە اتوم ەلەكتر ستانسياسىن سالۋ بويىنشا قوعامدىق تىڭداۋ ءوتىپ جاتىر. ءىس-شارانى قازاقستاننىڭ ازاماتتىق اليانسى مەن استانا قالاسىنىڭ قوعامدىق كەڭەسى ۇيىمداستىردى. شارا بارىسىندا الدىمەن سالا ماماندارى ءسوز الدى، كەيىن جينالعاندار ا ە س- كە قاتىستى سۇراقتارىنا جاۋاپ الادى.

«ەلىمىزدە ەلەكتر قۋاتىن وندىرەتىن ستانسيالاردىڭ %70 كومىر جاعادى جانە ولار توزعان. الداعى 10 جىلدا كەيبىر ستانسيالاردىڭ جۇمىسىن توقتاتۋعا تۋرا كەلەدى. ودان باسقا، ەلىمىزدە ەنەرگيا تۇتىنۋ كولەمى جىلدان جىلعا ءوسىپ كەلەدى، وسى ورايدا 2035 -جىلعا دەيىنگى ەلەكتر ەنەرگياسىن تۇتىنۋ جوسپارى بەكىتىلدى. ول بويىنشا الداعى 10 جىلدا قۋاتى 26,5 مىڭ گ ۆ ت ەنەرگيا ستانسيالارى ىسكە قوسىلادى. ونىڭ ىشىندە قولدانىستاعى ەلەكتر ستانسيالارىن جاڭارتۋ جۇمىستارى دا بار. قازىر قازاقستاندا جاڭارتىلعان ەنەرگيا كوزدەرى ياعني جەل، كۇن ەلەكتر ستانسيالارى جاقسى دامىپ جاتىر. ودان بولەك، سۋ ستانسيالارى دا جاڭارتىلۋدا»، - دەدى ەنەرگەتيكا مينيسترلىگى اتوم ەنەرگەتيكاسى جانە ونەركاسىبى دەپارتامەنتى ديرەكتورىنىڭ ورىنباسارى گۇلميرا مۇرسالوۆا.

ماماننىڭ ايتۋىنشا، كومىرمەن جۇمىس ىستەيتىن ەلەكتر ستانسيالاردان قورشاعان ورتاعا كەلەر زالال كوپ.

«سول سەبەپتەن رەفەرەندۋم ناتيجەلى بولعان جاعدايدا، ءبىز ۇلكەن قۋاتتى ەكى رەاكتورى بار ءبىر اتوم ەلەكتر ستانسياسىن سالۋدى قاراستىرىپ جاتىرمىز. سەبەبى اتوم ەلەكتر ستانسياسى جاسىل ەنەرگەتيكاعا جاتادى. كومىرقىشقىل گاز شىعىندىلارى ءنول. ءبىزدىڭ الدىمىزدا 2060 -جىلى كومىرتەگى بەيتاراپتىعىنا قول جەتكىزۋ، ياعني كومىرقىشقىل شىعىندىلارىن ازايتۋ ماقساتى تۇر. بۇگىندە ەل اۋماعىندا 46 كۇن ەلەكتر ستانسياسى، 59 جەل ەلەكتر ستانسياسى جۇمىس ىستەيدى. قازىر بۇكىل الەم اتوم ەلەكتر ستانسياسىن دامىتۋعا تىرىسىپ جاتىر، الەمدە 415 رەاكتور جۇمىس ىستەپ تۇر، ەڭ كوبى ا ق ش- تا، قىتاي 26 رەاكتور سالىپ جاتىر، ءبىر اتوم ەلەكتر ستانسياسىندا بىرنەشە رەاكتور جۇمىس ىستەۋى مۇمكىن. كورشىمىز وزبەكستان دا اتوم ەلەكتر ستانسياسىن سالامىز دەپ جاريالادى. ءبىزدىڭ ەلدىڭ اتوم سالاسىندا تاجىريبەسى مول»، - دەيدى ول.

اۆتور

داۋلەت ىزتىلەۋ