اۆتوكولىكپەن پاريجگە دەيىن: قازاقستاندىق ەرلى-زايىپتى التى بالاسىمەن 9 ەلدى ارالاعان
الماتىلىق سەرعالىم ءناسىپحان جۇبايى مەن 6 بالاسىن الىپ اۆتوكولىكپەن 9 ەلدى ارالادى. قازاقستاندىقتىڭ تەمىر تۇلپارى Toyota Ipsum 20 000 شاقىرىمدى ەڭسەرگەن.
كەيىپكەرىمىز كولىكپەن ساياحاتقا شىعۋ تۋرالى وي قايدان كەلگەنىن، ماقساتى مەن ساپار كەزىندە قانشا قاراجات كەتكەنىن ايتتى. سەرعالىم Stan.kz تىلشىسىنە ساياحات كەزىندەگى قىزىقتارىن باياندادى.
كەيىپكەرىمىزگە جۇبايى مەن 6 بالاسى ساپارلاس بولعان. ءوزى - 7 ۇل- قىزدىڭ اكەسى. ايتۋىنشا، سەرعالىم كولىك جوندەۋمەن اينالىسادى، جۇبايى بالا تاربيەسىمەن ۇيدە.
- ءبىر بالام قازىر استانادا اسكەري كوللەدجدە وقىپ جاتىر. سول سەبەپتى ول بىزبەن ساياحاتقا بارا الماي قالدى. ءسويتىپ 6 بالاممەن اۆتوساياحاتقا شىقتىق. نەگىزى ءوزىم قازاقستاندى كولىكپەن ءجيى ارالايمىن. وتباسىمدى كولىككە سالىپ الىپ بۋرابايدى، كوكشاتاۋ، تۇركىستاندى ارالايمىز. ءسويتىپ جۇرگەندە شەتەلگە شىققىمىز كەلدى. ونىڭ ۇستىنە بالالارىما تۇركيانىڭ كاپپادوكيا قالاسىنا اپارامىن دەپ ۋادە بەرگەن ەدىم. بارلىعى سودان باستالدى. نەگىزى باستى ماقساتىم - بالالارىم ەل- جەر كورسە ەكەن دەگەن تىلەك. بالالارىم ەۋروپانى كورسىن دەدىم. مەنتاليتەتىن تانىستىرعىم كەلدى. وسى ساپاردا قىزىم اۋدارماشى بولدى. قازاقستاننان تىس اعىلشىننىڭ قانشالىقتى كەرەك ەكەنىن ءوزى دە ءتۇسىندى. سونداي-اق قازاقستاندىقتارعا كولىكپەن دە ەل ارالاۋعا بولاتىنىن كورسەتكىم كەلدى. ونىڭ ۇستىنە كولىكپەن جۇرسەڭ، اينالاڭداعىنىڭ ءبارىن كورەسىڭ، - دەيدى سەرعالىم.
ايتۋىنشا، ۇشاقپەن بارساڭ تەك ەلدەگى كورنەكتى جەرلەردى ارالايسىڭ. ال كولىكپەن جۇرسەڭ جولداعىنىڭ ءبارىن كورىپ، جەرگىلىكتى حالىقپەن ارالاساسىڭ، مەنتاليتەتپەن تانىساسىڭ دەيدى.
- تۇركيامەن اراقاشىقتىقتى قاراسام 7000 شاقىرىم ەكەن. ارعى جاعىندا ەۋروپا، شەكارالاردىڭ اراسى جاقىن ەكەن. سوندا ەۋروپاعا دا باراتىن بولىپ شەشتىك. ءسويتىپ شەنگەن ۆيزاسىنا ءوتىنىش بەردىك. اراعا 3-4 كۇن سالىپ ەلشىلىكتەن حابارلاسىپ، ۆيزانىڭ دايىن ەكەنىن ايتتى. جالپى قۇجاتتارعا بايلانىستى ەشقانداي قيىندىق بولمادى. بارلىعى تەز ارادا دايىن بولدى. ساياحاتقا ايتارلىقتاي دايىندالمادىق. 2024 -جىلى جەلتوقساننىڭ 21 - كۇنى جولعا شىعىپ كەتتىك. الماتىدان فرانسياعا 11 كۇندە جەتتىم، - دەيدى كەيىپكەر.
ونىڭ سوزىنشە، ساياحاتقا ايتارلىقتاي دايىندىق جاساماعان. بۇعان دەيىن قازاقستاندى كولىكپەن ارالاپ ۇيرەنىپ قالعان بالالار بۇل ساياحاتتا دا ەش قينالماعان.
سەرعالىم الماتىدان فرانسياعا دەيىنگى ءجۇرىپ وتكەن جولىن ايتىپ بەردى.
- ءبىز الدىمەن اتىراۋعا باردىق، ودان رەسەيدىڭ استراحان قالاسىنا وتتىك. ودان شەشەنستان، داعىستاننان شىعىپ وسەتياعا باردىق. رەسەيگە جەتكەن سوڭ ۆلاديكاۆكازدا تۇنەدىك. گرۋزياعا كىرگەن سوڭ باتۋميگە جەتەيىك دەپ، تبيليسيگە سوقپادىق. ءسويتىپ باتۋميدە قوناقۇيگە بارىپ، ەكى كۇن سوندا دەمالدىق. بالالار دا تىنىقتى. ودان تۇركياعا بارىپ، شەكارادان وتتىك. تۇركيانىڭ ترابزون قالاسىنا باردىق، كەيىن كاپپادوكياداعى اۋە شارلارىن تاماشالاۋ ءۇشىن اسىعىس جولعا شىعىپ كەتتىك. ءسويتىپ تاڭعى 4 شاماسىندا كاپپادوكياعا جەتتىك. كەيىن ءتۇس قايتا الانياعا بەت الدىق. وندا ەكى كۇن دەمالىپ، ىستامبۇلعا جولعا شىقتىق. وندا ءبىر كۇن بولىپ، ەۋروپاعا باعىت الىپ، شەكاراعا جەتتىك. شەكارادان ءوتىپ بولگاريا مەن رۋمىنيانىڭ شەكاراسىندا ورنالاسقان ۆيدين قالاسىنا باردىق. وندا ءبىر كۇن تۇنەپ، ۆەنگريا ارقىلى اۆسترياعا جولعا شىقتىق. جولدارى وتە جاقسى ەكەن. جولداعى جىلدامدىق شەكتەۋى دە بىزدەگىدەي 90 ەمەس، 140 ەكەن. ماعان سونىسى ۇنادى. سول كۇنى كەشكە اۆسترياعا جەتىپ، قوناقۇيدە دەمالىپ العان سوڭ، گەرمانيانى باسىپ ءوتىپ، فرانسياعا بەت الدىق. كەشكە فرانسياعا جەتىپ، ەيفەل مۇناراسىنىڭ جارقىراعانىن تاماشالادىق، كوشەلەرىن ارالادىق. وندا ءبىر كۇن تۇنەپ، تۇستەن كەيىن ەلگە قايتاتىن بولىپ جولعا شىقتىق، - دەيدى ساياحاتشى.
11 كۇندە پاريجگە جەتكەن سەرعالىمنىڭ وتباسى قالانى ارالىپ، جاقىندارىنا سىيلىق العان سوڭ ءدال سول جولمەن قايتا قازاقستانعا جولعا شىققان. ءبىراق اتىراۋعا كىرگەن سوڭ استانا ارقىلى ۇيىنە ورالعان.
- جالپى ساياحاتقا 3 ميلليون تەڭگەگە كەتتى. ونىڭ 500 مىڭى ۆيزا مەن شەتەلدىك ءتولقۇجاتقا كەتتى. 370 مىڭ تەڭگە ۆيزا ورتالىعىنا جۇمسادىم، 120 مىڭ تەڭگەگە شەتەلدىك ءتولقۇجات جاساتتىم. اۆتوساياحات كەزىندە گرۋزيادا ەكى كۇن، تۇركيادا ەكى كۇن، بولگاريادا ەكى كۇن بولدىم. قالعان كەزدە تۇنەپ وتىردىق. كوپ قاراجات كەتتى دەپ ايتا المايمىن، قوناقۇيگە توقتاعانىمىز بار. ءبىراق فرانسيانىڭ اقىلى جولدارى مەن جانارماي قىمبات ەكەن. ءبىزدىڭ تەڭگەمەن شاققاندا 1100 تەڭگە. شەكارادان وتكەندە ەشقانداي قيىندىق بولعان جوق. ءبارى بالامەن كەلە جاتقانىمىزدى كورىپ، بارىنشا تەز وتكىزىپ جىبەرىپ وتىردى-، - دەيدى سەرعالىم.
قازاقستاندىق ساياحاتشىلارعا گرۋزيا قاتتى ۇناعان. ايتۋىنشا، حالقى قوناقجاي، تاعامدارى ءدامدى، قىزمەت كورسەتۋى دە جوعارى دەڭگەيدە، باعالارى دا قولجەتىمدى بولعان. ءبىراق تۇركيا كەرىسىنشە، كوڭىلدەرىنەن شىقپاعان. بىرىنشىدەن، قىمبات، ەكىنشىدەن، تۋريستەر كوپ بولعاندىقتان با، قىزمەت كورسەتۋى ناشار بولدى دەپ وتىر. ال ەۋروپانىڭ قالالارى ءوز الدىنا قىمبات ەكەنىن ايتتى. تاماق تانۋ دا، قوناقۇيى دە قىمباتقا تۇسكەن.
سەرعالىم شەتەلدە ءجۇرىپ كورگەن قىزىقتارىن ايتىپ بەردى. ايتۋىنشا، شەتەلدىك ازاماتتىڭ قازاق تىلىندە جاڭىلماي سويلەگەنىن كورىپ تاڭعالعان.
- ۆەنرگيانىڭ شەكاراسىنان وتكەندە ساقتاندىرۋ ساتىپ الماق بولدىم. دۇڭگىرشەككە بارسام، ونداعى قىز مەنىمەن قازاقشا سويلەستى. سويتسەك، ول قىز ۆەنرگيالا قازاق ءتىلىن وقىعان ەكەن. تاعى ءبىر قىزىق جاعداي بولدى. جولدا توقتاپ، قايتا جولعا شىققان كەزدە فۋرا ايدايتىن ءبىر جىگىت جۇگىرىپ كەلە جاتىر ەكەن. ءبىزدىڭ ءنومىردى كورىپ قاپتى. سويتسەم، كوكشەتاۋدىڭ جىگىتى ەكەن. تۋىسىمىزدى كورگەندەي امانداسىپ، اڭگىمە ايتتىق - دەيدى ول.
سەرعالىم قازاقستانعا قايتىپ كەلە جاتىپ گەرمانيانى سىرتتاي ۇناتقان. 1-2 قالاسىن ارالاپ كورمەك بولعان، الايدا اۋا رايىنىڭ قولايسىزدىعىنا بايلانىستى ارالاي الماعان. الداعى ۋاقىتتا كۇزگە قاراي گەرمانيا مەن يتالياعا بارۋ جوسپاردا بار دەيدى ساياحاتشى.
@siko_miko.kz Алматы-Париж автосаяхат 6 баламен! #Almaty #реки #paris #автосаяхат #toyota #қызықтаймс ♬ оригинальный звук - Ретро хиты
