پاتەرگە ادام تىركەۋدى رەتتەۋ: استانادا قانداي ليميت قويىلماق
استانا. KAZINFORM - استانادا ادامداردى تۇرعىلىقتى مەكەنجايى بويىنشا تىركەۋگە قاتىستى زاڭناماعا وزگەرىستەر ەنگىزۋ قاراستىرىلىپ جاتىر. ەگەر ول وزگەرىستەر قابىلدانسا، بۇدان بىلاي ءبىر مەكەنجايعا مىڭداعان ادامدى تىركەۋ مۇمكىن بولمايدى.
استانا قالاسى پوليسيا دەپارتامەنتى كوشى-قون باسقارماسى باستىعىنىڭ ورىنباسارى قاناي جۇمابەكوۆتىڭ ايتۋىنشا، قازىرگى كەزدە ادامداردى تۇرعىلىقتى جەرى بويىنشا تىركەۋ قاعيداسىندا ءبىر پاتەرگە ناقتى قانشا ادامدى تىركەۋگە بولاتىنى زاڭمەن رەتتەلمەگەن. سوندىقتان دا ۇلكەن قالالاردا ءبىر مەكەنجايعا مىڭنان اسا ادامدى تىركەۋ دەرەكتەرى انىقتالىپ وتىر.
«كوشى- قون زاڭناماسىنا تۇرعىلىقتى جەرى بويىنشا تىركەۋ ماسەلەسىنە قاتىستى وزگەرىستەر قاراستىرىلىپ جاتىر. ماسەلەن، پاتەرگە ادامدى تىركەۋ كەزىندە ءار ادامعا 15 شارشى مەتر بەلگىلەنبەك. ءبىراق سول ۇيدە تۇرىپ جاتقان وتباسى مۇشەلەرى ەسەپكە الىنبايدى. دەمەك، پاتەر يەسىنىڭ ءوزى، جۇبايى، اتا- اناسى، بالالارى ەسەپتەلمەيدى، باسقا ادامدار عانا ەسەپتەلەدى. بۇل جاعدايدا، مىسالى، پاتەر اۋماعى 60 شارشى مەتر بولسا، وندا بوتەن 4 ادامدى عانا تىركەۋگە تۇرعىزۋ مۇمكىن بولادى»، - دەيدى قاناي زياحان ۇلى.
جۋىردا ماجىلىستە قازاقستان رەسپۋبليكاسىنىڭ كەيبىر زاڭنامالىق اكتىلەرىنە استانانى جانە رەسپۋبليكالىق ماڭىزى بار قالالاردى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى تانىستىرىلعان بولاتىن. وندا «حالىقتىڭ كوشى- قونى تۋرالى» زاڭنىڭ 51-بابى 2-تارماعى 1-تارماقشاسىنا مىناداي مازمۇنداعى بولىك قوسۋ كوزدەلگەن:
«استانا اۋماعىندا تۇرعىلىقتى جەرى جانە ۋاقىتشا بولاتىن (تۇراتىن) جەرى بويىنشا تىركەۋ قازاقستان رەسپۋبليكاسىنىڭ استانا مارتەبەسى تۋرالى زاڭناماسىنا سايكەس استانانىڭ جەرگىلىكتى وكىلدى ورگانى بەكىتەتىن استانا اۋماعىندا تۇرعىلىقتى جەرى جانە ۋاقىتشا بولاتىن (تۇراتىن) جەرى بويىنشا تىركەۋ نورماتيۆتەرى ەسكەرىلە وتىرىپ جۇزەگە اسىرىلادى».
بۇل دەگەنىمىز - جەرگىلىكتى ءماسليحاتقا استانادا تۇراقتى جانە ۋاقىتشا تىركەۋ ماسەلەلەرىنە قاتىستى نورماتيۆتەر بەلگىلەۋ وكىلەتتىگىن بەرۋ دەگەندى بىلدىرەدى.
ازىرشە زاڭ جوباسى تالقىلانۋ ۇستىندە.
ايتا كەتەيىك، جۋىردا حالىقتى تىركەۋدىڭ جاڭا ەرەجەسى بەكىتىلدى.
