اتقا ءمىنۋ مەديتسينالىق وڭالتۋدىڭ كلينيكالىق حاتتاماسىنا ەنگىزىلمەك
استانا. KAZINFORM - يپپوتەراپيا مەديتسينالىق وڭالتۋدىڭ كلينيكالىق حاتتاماسىنا ەنگىزىلمەك. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.
- يپپوتەراپيا قىزمەتى كەپىلدەندىرىلگەن تەگىن مەديتسينالىق كومەكتىڭ كولەمى جانە مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا (د س م- ءنىڭ 2020 -جىلعى 30 -قازانداعى № ق ر د س م-170/2020 بۇيرىعى) كورسەتىلەتىن قىزمەتتەر تىزبەسىنە ەنگىزىلگەن. قازىرگى ۋاقىتتا يپپوتەراپيانى «نيەۆرولوگيا جانە نەيروحيرۋرگيا» (بالالارعا ارنالعان) بەيىنى بويىنشا ەمدەۋدىڭ ەكىنشى كەزەڭىندە مەديتسينالىق وڭالتۋدىڭ كلينيكالىق حاتتاماسىنا ەنگىزۋ ماسەلەسى قاراستىرىلۋدا، - دەدى ولجاس بەكتەنوۆ.
يپپوتەراپيا - ۇيرەتىلگەن اتپەن ءجۇرۋ ارقىلى وڭالتۋ ءادىسى. يپپوتەراپيانىڭ بىرەگەيلىگى بالالاردىڭ پسيحيكاسىنا اسەر ەتۋدىڭ دەنەگە ارنالعان ادىستەرىنىڭ ۇيلەسىمىندە جاتىر. ەمدىك ماقساتتا اتپەن ءجۇرۋ بالانىڭ دەنەسىنە بيوحيميالىق اسەر ەتەدى، ونى نىعايتادى. ساراپشىلار دا يپپوتەراپيانىڭ كەڭ سپەكترلى اۋرۋلارعا شالدىققان بالالاردى دامىتۋ مەن وڭالتۋدىڭ ەرەكشە ادىستەرىنىڭ ءبىرى ەكەنىن مويىندايدى. جىلقى مۇمكىندىگى شەكتەۋلى، سۇيەك- بۇلشىق ەت جۇيەسىندە اقاۋى بار، سونداي-اق، پسيحيكالىق دەرتى بار بالالارعا وڭ اسەر ەتەدى.
بۇعان دەيىن جەتىسۋ وبلىسىندا ەرەكشە بالالارعا ارنالعان تۇڭعىش يپپوتەراپيا ورتالىعى اشىلعانىن جازعان ەدىك.
اۆتور
مارلان جيەمباي
