اتاقتى «مونا ليزا» كارتيناسىن بولەك زالعا كوشىرۋ ءۇشىن 500 ميلليون ەۋرو قاجەت

«Мона Лиза» картинасын бөлек залға көшіру үшін 500 миллион еуро қажет
فوتو: pixabay

استانا. KAZINFORM - لەوناردو دو ۆينچيدىڭ اتاقتى تۋىندىسىن لۋۆر مۋزەيىنىڭ بولەك زالىنا ساقتىق شارالارىن ساقتاي وتىرىپ كوشىرۋ ءۇشىن 500 ميلليون ەۋروعا جۋىق قاراجات قاجەت ەكەن.

Euronews حابارلاعانداي، مۋزەيگە كەلۋشىلەردىڭ كوبى كارتينانى انىق كورە المايتىنىنا شاعىمدانعان. قورعانىس شىنى پانەلىنىڭ ارتىندا ءىلۋلى تۇرعان كارتينا ۇلكەن زالدىڭ ىشىندە پوشتا ماركاسى سياقتى اسەر قالدىراتىنى ايتىلىپ جاتىر.

لۋۆردىڭ 16-عاسىرداعى يتالياندىق كەسكىندەمەلەر بويىنشا باس كۋراتورى ۆينسەنت دەليەۆيننىڭ ايتۋىنشا، بۇل كارتينا اۆتورىنىڭ يدەياسىنا قايشى كەلەدى.

«لەوناردو دا ۆينچي كارتينا مەن ونى كورگەن ادام اراسىندا جەكە قارىم-قاتىناس ورناتقىسى كەلدى»، - دەيدى ول.

ايتا كەتەيىك، قاۋىپسىزدىك تالابىنىڭ قاتاڭ بولۋى سونشالىق، مۋزەي كەلۋشىلەرىنە كارتينانى كورۋ ءۇشىن نەبارى 30 سەكۋند عانا ۋاقىت بەرىلەدى. ال بۇل ۋاقىتتا سەلفيگە تۇسۋگە اسىققان ادامدار ءبىر-بىرىنە ىڭعايسىزدىق تۋدىرىپ، تۋىندىدان ءلاززات الۋعا كەدەرگى كەلتىرەدى ەكەن. سوندىقتان دا لۋۆر ديرەكسياسى پورترەتتى قايتا ءىلۋ كەرەك دەگەن شەشىم قابىلدادى.

مۇراجاي ديرەكتورى لورەنس دە كارستىڭ ايتۋىنشا، كارتينانى كوشىرۋ وڭاي شارۋا ەمەس. ول ءۇشىن لۋۆر مۋزەيىنە جاڭا كىرەبەرىس اشىپ، جەرتولەدەگى ەكى زالدى رەتتەۋ قاجەت. ءسويتىپ، «مونا ليزا» تۋىندىسى جەكە زالعا ورنالاستىرىلىپ، كەلۋشىلەردىڭ كەزەگىن ازايتۋعا جول اشىلماق.

وسىلايشا، ءتيىستى جوندەۋ جۇمىستارىنا 500 ميلليون ەۋرو قاجەت بولىپ وتىر. بۇل باستامانى فرانسيانىڭ مادەنيەت مينيسترلىگى قولدادى. ەندى قارجى ءمينيسترىنىڭ شەشىمىن كۇتۋ عانا قالدى.

اۆتور
ورالحان قوجانوۆ

سوڭعى جاڭالىقتار