اتاقتى باياناۋىلدا ەكى اپتادان كەيىن تۋريستىك ماۋسىم اشىلادى
پاۆلودار. KAZINFORM - قازىر باياناۋىل اۋدانىندا جالپى سىيىمدىلىعى 5 مىڭ ادامعا ارنالعان 54 دەمالىس ءۇيى بار.
«جاسىباي» دەمالىس ايماعىندا تۋريستىك ماۋسىمنىڭ رەسمي اشىلۋى 14-ماۋسىمعا جوسپارلانعان.
اۋدان باسشىسى ارداق كىسەنتايەۆتىڭ ايتۋىنشا، قازىر اۋداندا جالپى سىيىمدىلىعى 5 مىڭ ادامعا ارنالعان اساتىن 54 دەمالىس ءۇيى بار. جول بويىندا قىزمەت كورسەتۋ نىساندارى جۇمىس ىستەيدى. جازعى كەزەڭدە «جاسىباي»، «سابىندىكول» جانە «تورايعىر» دەمالىس ايماقتارىندا قوسىمشا تاماقتانۋ ورىندارى مەن ساۋدا پاۆيلوندارىن اشۋ جوسپارلانىپ وتىر.
- 14 تۋريستىك مارشرۋت ازىرلەنىپ، ىسكە قوسىلۋعا دايىن. دەمالۋشىلاردىڭ قاۋىپسىزدىگىن قامتاماسىز ەتەتىن بارلىق قىزمەت ازىرلىگى مىعىم. بەينەباقىلاۋ كامەرالارى ورناتىلىپ، سۋ ايدىندارىندا قۇتقارۋ بەكەتتەرى ۇيىمداستىرىلدى، جول بويىنداعى قىزمەت كورسەتۋ نىساندارى جۇمىس ىستەيدى. تۋريستىك ينفراقۇرىلىمدى ودان ءارى دامىتۋ ءۇشىن شامامەن 568 ميلليون تەڭگەگە سابىندىكول كولىنىڭ جاعالاۋ ايماعىن اباتتاندىرۋ كوزدەلگەن. جوبا بويىنشا كىرەبەرىستەر، شاعىن ارحيتەكتۋرالىق فورمالار ورناتىلادى جانە باقىلاۋ الاڭدارى ۇيىمداستىرىلادى. سونداي- اق، باياناۋىل اۋىلىندا 1 ميلليارد تەڭگەگە جۋىق قاراجاتقا ولكەتانۋ مۋزەيى ورنالاساتىن ۆيزيت-ورتالىقتىڭ قۇرىلىسى جۇرگىزىلىپ جاتىر. بۇل باستامالار «جاسىباي» كولىنە تۇسەتىن جۇكتەمەنى ازايتۋعا باعىتتالعان، - دەپ حابارلادى اۋدان اكىمدىگىنەن.
تورايعىر اۋىلىنداعى اينالاسىندا قارا قاندىاعاش وسەتىن بىرەگەي تابيعي ورىن - «اۋليە بۇلاق» اۋماعىن اباتتاندىرۋعا ەرەكشە نازار اۋدارىلىپ وتىر. وندا ەكولوگيالىق ءتۋريزمدى دامىتۋ ءۇشىن قولايلى جاعداي جاسالدى.
سونداي-اق كەلۋشىلەر ءجيى باراتىن «كەمپىرتاس» جارتاسىنا دەيىنگى جولدى اسفالتتاۋ كوزدەلگەن. جارتاستىڭ جانىندا قولا ءداۋىرىنىڭ ارحەولوگيالىق ەسكەرتكىشتەرى - اندرونوۆ مادەنيەتىنىڭ قورىمدارى مەن قونىستارى ورنالاسقان.
