اتاجۇرتقا اتپەن ساپار شەككەن قانداستار استاناعا جەتتى
استانا. KAZINFORM - قىتايدىڭ تارباعاتاي ايماعىنان اتپەن جولعا شىققان جاس جۇبايلار - قۋانبەك ءتۇسىپحان ۇلى مەن جاينا ەركىن قىزىن استانا حالقى ىستىق ىقىلاسپەن كۇتىپ الدى.
ولار تارباعاتاي ايماعىنا قاراستى ساۋان اۋدانىنان 8-تامىز كۇنى جولعا شىققان بولاتىن. 74 كۇنىن ات ۇستىندە وتكىزگەن جولاۋشىلار قازاقتىڭ ۇلان-عايىر دالاسىن ات تۇياعىمەن دۇبىرلەتىپ، سارىارقاعا جەتتى. ساپاردىڭ جالپى ارالىعى - 2500 شاقىرىمنان اسادى.
- ويعا العان ۇلكەن ارمانىمىز ورىندالدى. ەرەكشە قۋانىشتىمىن! اسەرىمدى ايتىپ جەتكىزە المايمىن. بۇل ساپار - ومىرىمىزدە وشپەستەي ورىن العان ەرەكشە ەستەلىك بولىپ قالادى، - دەيدى قۋانبەك ءتۇسىپحان ۇلى.
ساياحاتشىلار ات جالىنداعى الىس ساپاردىڭ قيىندىعىن جول بويىنداعى ىستىق ىقىلاسپەن قارسى الىپ، كومەك كورسەتكەن اقپەيىل جانداردىڭ ىزگى نيەتى ۇمىتتىرىپ جىبەرگەنىن ايتادى.
- شەكارادان وتكەلى جولداعى ەلدىڭ ىستىق ىقىلاسى، پەيىلى، مەيىرى بىزگە تىلەكشى بولىپ، بارىن بەرىپ، جوعىمىزدى تولىقتاپ، جۇگىرىپ جۇرگەن ىزگى نيەتى ءبىزدى ەرەكشە تەبىرەنتتى. ءتىپتى ورىس، تۇرىك سەكىلدى وزگە ۇلت وكىلدەرى دە ءبىزدى ەستىپ، الىستان ىزدەپ كەلىپ، ازىق-تۇلىك بەرىپ، كومەكتەسىپ جاتىر. جول بويى تىلەۋلەس بولىپ، قولداۋ كورسەتكەن بارشا اعايىنعا العىسىمىز شەكسىز. بۇل - ءبىر وتباسىنىڭ ەمەس، تۇتاس ۇلتىمىزدىڭ ساپارى بولعانداي. ساپاردان العان اسەرىمىز وتە كەرەمەت: اسەم تابيعات، قوناقجاي ەل، جولداعى كورىكتى جەرلەردى كورىپ، بىلگەنىمىزدى ءتۇسىرىپ، الەۋمەتتىك جەلىگە جاريالاپ وتىردىق. ارتتا قالعان الىستاعى اعايىن دا حابارلاسىپ، ەلدىڭ ىقىلاسىنا ريزا بولىپ سالەم جولداپ جاتىر، - دەيدى جۇبايلار.
كۇتىپ الۋ شاراسى اياسىندا دۇنيەجۇزى قازاقتارى قاۋىمداستىعىنىڭ وكىلدەرى جولاۋشىلاردى ارنايى توسبەلگىمەن ماراپاتتاپ، العىس حات تابىس ەتتى.
الىس جولدى اتپەن باعىندىرىپ، استاناعا جەتكەن قانداستارىمىزدى كۇتىپ الۋعا كەلگەن ءماجىلىس دەپۋتاتى ەرلان سايروۆ جاستاردىڭ ءىسى ەلدى بەرەكە-بىرلىككە شاقىرعانىن اتاپ ءوتتى.
- بۇگىن قازاق الەمى ءۇشىن وتە ايتۋلى كۇن دەپ ايتۋعا بولادى. ويتكەنى سوناۋ ارعى بەتتەن قۋانبەك پەن جاينا قارىنداسىمىز قازاقتىڭ قاراشاڭىراعىنا ات تەرلەتىپ، ەلىمىزگە دەگەن ساعىنىشىن الىپ كەلىپ وتىر. ءبىزدى ءبىر قۋانتاتىنى - ات ۇستىندەگى جۇبايلار قازاق ەلىنە كىرگەننەن باستاپ حالقىمىز بۇل ازاماتتارعا شىن ىقىلاسىن، ىزگى نيەتىن كورسەتتى. بۇل - ۇلتىمىزدىڭ ىنتىماعى مەن بىرلىگىنىڭ جوعارى دەڭگەيدە ەكەنىن كورسەتەدى. سوندىقتان بۇل ۇزاق ساپاردى قازاق حالقىنىڭ ىنتىماعى مەن دوستىعىنىڭ ساپارى بولدى دەپ ايتۋعا تولىق نەگىز بار. وسىنداي يگى شارانى قولعا العان جولاۋشى جۇبايلارعا ۇلكەن العىس بىلدىرەمىز. استاناعا كەلگەن قادامدارىڭىز قۇتتى بولسىن! الەمنىڭ ءار تۇكپىرىندەگى قانداستارىمىز قازاق ەلىنە جينالا بەرسىن، - دەدى ەرلان سايروۆ.
بۇل قۋانبەك پەن جاينانىڭ العاشقى الىس ساپارى ەمەس. قول ۇستاسقان قوس عاشىق 2021-جىلى شينجاڭنان جولعا شىعىپ، 4000 شاقىرىمداي جولدى اتپەن ءجۇرىپ ءوتىپ، بەيجىڭگە بارعان ەكەن.
ايتا كەتەيىك، بۇعان دەيىن سايتىمىزدا ساياحاتشىلاردىڭ ۇزاق ساپارى تۋرالى ماقالا جارىق كورگەن ەدى.
اۆتور ريزابەك نۇسىپبەك ۇلى
