اپتاپ ىستىق: دەمالىس كۇندەرى اۋا رايى قانداي بولادى؟

استانا. قازاقپارات - قازگيدرومەت 5، 6، 7-شىلدەگە ارنالعان اۋا رايى بولجامىن جاريالادى.

اتموسفەرالىق فرونتالدى بولىكتەر وتۋىنە بايلانىستى قازاقستاننىڭ كوپ بولىگىندە نايزاعاي ويناپ، جاڭبىر جاۋادى. 5-شىلدەدە رەسپۋبليكانىڭ سولتۇستىگىندە، 5-6-شىلدەدە شىعىسىندا قاتتى جاڭبىر، بۇرشاق جاۋىپ، داۋىل سوعادى.

تەك رەسپۋبليكانىڭ وڭتۇستىگىندە جاۋىن-شاشىنسىز اۋا رايى ساقتالادى. ەل بويىنشا جەل كۇشەيەدى، وڭتۇستىكتە شاڭدى داۋىل سوعادى.

«5-شىلدەدە ەلىمىزدىڭ شىعىسىندا كۇندىز 40-42 گرادۋسقا دەيىن قاتتى ىستىق، وڭتۇستىگىندە 45-46 گرادۋسقا دەيىن قاتتى ىستىق، وڭتۇستىك-شىعىسىندا 40-45 گرادۋس ىستىق بولادى. قالعان وڭىرلەردە اۋا تەمپەراتۋراسى ايتارلىقتاي وزگەرمەيدى»، - دەپ جازىلعان حابارلامادا.