اپتاپ كۇشەيدى: يتاليا مەن يسپانيادا قىزىل دەڭگەيلى دابىل جاريالاندى

استانا. KAZINFORM - ەۋروپانى شارپىعان اپتاپ ىستىق ءبىرقاتار ەلدە اۋا تەمپەراتۋراسىنىڭ 40 تان اسىپ كەتۋىنە سەبەپ بولدى، دەپ حابارلايدى euronews.

وسىعان بايلانىستى بيلىك وكىلدەرى بارىنشا ساق بولۋعا شاقىرىپ وتىر، سەبەبى قۋاڭشىلىق، قاتتى جەل مەن اپتاپ ورمان ورتتەرىنە اكەلۋى مۇمكىن.

يتاليانىڭ بىرنەشە ءوڭىرى كۇننىڭ قاتتى ىسيتىن كەزىندە كەيبىر جۇمىس تۇرىنە تىيىم سالۋ مۇمكىندىگىن قاراستىرىپ جاتىر. جەكسەنبىدە، ياعني 29 -ماۋسىم تاڭىنا قاراي ەلدىڭ 21 قالاسىندا قاۋىپتىڭ قىزىل دەڭگەيى جاريالاندى. بۇل شارانى ەنگىزۋدى جوسپارلاپ وتىرعان وڭىرلەر قاتارىندا لاتسيو، توسكانا، كالابريا، اپۋليا جانە ۋمبريا بار.

يتاليا دەنساۋلىق ساقتاۋ مينيسترلىگى 27 قالانىڭ 17سىندە اپتاپقا بايلانىستى ەڭ جوعارى دەڭگەيدەگى ەسكەرتۋ جاريالادى. ولاردىڭ قاتارىندا ريم، ميلان جانە نەاپول دا بار. ريمدە تۋريستەر كوليزەي مەن تريەۆي سۋبۇرقاعى ماڭىندا كولەڭكە ىزدەپ، كەيبىرى قولشاتىر ۇستاپ، قالالىق سۋبۇرقاقتاردان سۋ ءىشىپ سالقىنداۋعا تىرىسقان. ۇقساس كورىنىستەر ميلان مەن نەاپولدا دا بايقالدى، وندا كوشە ساتۋشىلارى تۇرعىندار مەن تۋريستەرگە ىستىقتان قورعانۋعا كومەكتەسۋ ءۇشىن ليموناد ساتقان.

ەۋروپانىڭ باسقا بولىكتەرىندە يسپانيانىڭ ۇلتتىق مەتەورولوگيالىق اگەنتتىگى AEMET ماۋسىم ايى تاريحتاعى ەڭ ىستىق اي بولۋى مۇمكىن دەپ ەسكەرتتى. سيەۆيليا مەن ەلدىڭ وڭتۇستىگىندەگى باسقا قالالاردا اۋا تەمپەراتۋراسى 42°C قا دەيىن كوتەرىلەدى.

يسپانيانىڭ دەنساۋلىق ساقتاۋ ورگاندارى تۇرعىندارعا اپتاپ ىستىقتىڭ شارىقتاۋ شەگىندە دەنە جۇكتەمەلەرىنەن اۋلاق بولۋعا جانە سۋ رەجيمىن ساقتاۋ كەرەكتىگىن ەسكەرتتى، اسىرەسە قارتتار مەن بالالار سياقتى وسال توپتارعا ەرەكشە نازار اۋدارىلىپ وتىر.

ساراپشىلار ەۋروپانىڭ وڭتۇستىگىندە اپتاپ تولقىندارىنىڭ جيىلەپ، كۇشەيۋىن جاھاندىق كليماتتىڭ وزگەرۋىمەن بايلانىستىرادى.

سونداي-اق گرەكيا مەن پورتۋگاليادا دا جوعارى تەمپەراتۋرا تىركەلدى، بۇل ەلدەردە جەرگىلىكتى تۇرعىندار مەن تۋريستەر اپتاپتان قورعانۋدىڭ امالدارىن قاراستىرىپ جاتىر.