اتا-باباسىن ۇلىقتاۋدى سۇراپ ۇجىمدىق حات جازۋ ادەتكە اينالىپ بارادى - پرەزيدەنت
استانا. KAZINFORM - سوڭعى كەزدە اتا-باباسىنىڭ، جەرلەسىنىڭ ەسىمىن ۇلىقتاۋدى سۇراپ، ۇجىمدىق حات جازۋ ادەتكە اينالىپ بارادى.
مۇنداي ۇستانىمدار ەلىمىزدىڭ ءبىرتۇتاس يدەولوگيالىق كەڭىستىگىنە زيان كەلتىرەدى. بۇل تۋرالى مەملەكەت باسشىسى قاسىم-جومارت توقايەۆتىڭ ۇلتتىق قۇرىلتايدىڭ ءۇشىنشى وتىرىسىنداعى سوزىندە ايتتى، دەپ حابارلايدى اقوردانىڭ باسپا ءسوز قىزمەتى.
«ءاربىر قازاق اتا-باباسىن قۇرمەتتەيدى، رۋحىنا تاعزىم ەتەدى. سوندىقتان، شەجىرە ءبىزدىڭ مادەني كودىمىزدىڭ اجىراماس بولىگىنە اينالعان. ءبىراق ءبىز تەك قانا وسى تۇسىنىكپەن شەكتەلىپ قالماۋىمىز قاجەت. ەڭ باستىسى، بۇل ماسەلەنى ەشقاشان ساياساتپەن ارالاستىرۋعا بولمايدى.
سوڭعى كەزدە اتا-باباسىنىڭ، جەرلەسىنىڭ ەسىمىن ۇلىقتاۋدى سۇراپ، ۇجىمدىق حات جازۋ ادەتكە اينالىپ بارادى. اتاسىنا ەسكەرتكىش قويۋدى، كوشەگە اتىن بەرۋدى وتىنەتىندەر كوبەيدى. بۇل-جاعىمسىز جاعداي. مۇنداي ۇستانىمدار ەلىمىزدىڭ ءبىرتۇتاس يدەولوگيالىق كەڭىستىگىنە زيان كەلتىرەدى. ۇرپاق تاربيەسىنە كەسىرىن تيگىزەدى. ءتىپتى، شەتەلدە ءبىزدى كونە زامانعا جانە كەڭەستىك كەزەڭگە قاتىستى مونۋمەنتتەر قاپتاعان «ەسكەرتكىشتەر ەلى» دەپ ايتاتىن بولدى»، - دەدى ق ر پرەزيدەنتى.
سونداي- اق، مەملەكەت باسشىسى ونوماستيكا سالاسىندا بەلگىلى تاريحي تۇلعالارمەن قاتار، جالپى ۇلتتىق قۇندىلىقتار دا نازاردان تىس قالماۋعا ءتيىس ەكەنىن اتاپ ءوتتى.
«تاۋەلسىزدىك، رەسپۋبليكا، بىرلىك سياقتى مەملەكەتتىلىگىمىزدىڭ باستى تۇعىرى سانالاتىن نەگىزگى ۇعىمدارعا باسا ءمان بەرۋ كەرەك. ەلدىگىمىزدى ساقتايمىز، مىقتى مەملەكەت بولامىز دەسەك، وسىنىڭ ءبارىن ەستەن شىعارماعان ابزال.
«شىن مانىندە، جەكە مۇددەسىن ەمەس، ەل مۇددەسىن بارىنەن بيىك قوياتىن ازاماتتار ۇرپاققا ۇلگى بولۋى قاجەت. اسىرەسە، قازىرگى گەوساياسي جاعدايدا بۇل مىندەت اسا ماڭىزدى ەكەنىن ۇمىتپاعان ءجون»، - دەدى قاسىم-جومارت توقايەۆ.
وسى ورايدا، پرەزيدەنت ايگىلى قالامگەر، كورنەكتى مەملەكەت قايراتكەرى ءابىش كەكىلبايەۆتى ايرىقشا اتاپ ءوتتى.
"ول - رۋحانيات سالاسىندا، مەملەكەتتىك قىزمەتتە ەرەكشە قولتاڭباسىن قالدىرعان ءبىرتۋار تۇلعا، كلاسسيك جازۋشى. مەن ابەكەڭمەن قىزمەتتەس بولدىم، جاقىن ارالاستىم. ءابىش كەكىلباي ۇلى ناعىز تاۋ تۇلعالى ازامات ەدى. ول ىشكى مادەنيەتى وتە جوعارى جان بولاتىن. ەشقاشان بىرەۋدى بىرەۋگە قارسى قويمايتىن، بارىنە سۇيىسپەنشىلىكپەن قارايتىن. ءار ايماقتان وزىنە سالەم بەرۋگە كەلگەن ازاماتتارعا ەسىگى قاشاندا ايقارا اشىق ەدى. ونىمەن تىلدەسكەن ادامدار رۋحتانىپ، قاناتتانىپ شىعاتىن. ابەكەڭ ۇساق- تۇيەك اڭگىمەگە بەرىلمەيتىن، جالپى ادامزاتقا ورتاق ماسەلەلەر تۋرالى ويلانىپ، تولعاناتىن. ءبىر سوزبەن ايتساق، ءابىش كەكىلبايەۆ ناعىز زيالى ادام، كەمەڭگەر تۇلعا بولدى.
سونداي-اق بۇگىن ورتامىزدا قۇرىلتاي مۇشەسى، اسا كورنەكتى مادەنيەت قايراتكەرى، قازاقستاننىڭ ەڭبەك ەرى ءىليا جاقانوۆ وتىر. ىلەكەڭ دە - ناعىز مەملەكەتشىل تۇلعا، زيالى قاۋىم ىشىندەگى اسا بەدەلدى اعامىز. ءاردايىم سالماقتى وي، ساليقالى پىكىرىمەن ەلگە سىيلى بولىپ جۇرگەن ارداقتى ازامات.
ءبىز حالقىمىزدىڭ وسىنداي پەرزەنتتەرىن، ولاردىڭ ءومىر جولىن جان-جاقتى دارىپتەۋىمىز كەرەك، لايىقتى قۇرمەت كورسەتۋىمىز قاجەت»، - دەدى مەملەكەت باسشىسى.
اۆتور
ەربول جانات
