اتا-انانىڭ 5 قاتەلىگى: ءى ءى م ەسكەرتۋ جاسادى

استانا. KAZINFORM - ىشكى ىستەر مينيسترلىگى ەرەسەكتەر ءجيى جىبەرەتىن بەس قاتەلىكتى اتادى، - دەپ جازدى Polisia.kz.

بالالاردى قاراۋسىز قالدىرۋ اۋىر سالدارعا اكەلۋى مۇمكىن. مۇنداي جاعدايدا تۋىندايتىن باستى قاۋىپتەردىڭ قاتارىندا جول-كولىك وقيعالارى، بالالاردىڭ تەرەزەدەن قۇلاپ كەتۋى، سۋ ايدىندارىندا قازا تابۋى بار.

جىل باسىنان بەرى بالالاردىڭ تەرەزەدەن قۇلاۋىنا بايلانىستى 50 جاعداي تىركەلدى، ونىڭ تورتەۋى ولىممەن اياقتالعان.

كولىك قاعۋى سالدارىنان 22 بالا كوز جۇمىپ، 1386 سى جاراقات العان. ودان بولەك، 10 بالا سۋعا باتىپ كەتكەن.

بالانىڭ كىممەن ارالاساتىنىن قاداعالاماۋ ونىڭ جامان ورتاعا تۇسۋىنە سەبەپ بولۋى مۇمكىن. اتا-انانىڭ نەمقۇرايلىلىعى جاسوسپىرىمدەردىڭ كۇماندى ادامدارمەن ۋاقىت وتكىزۋىنە، قۇقىقبۇزۋشىلىق جاساپ، پسيحواكتيۆتى زاتتاردى قولدانىپ، ديەۆيانتتى مىنەز-قۇلىقتى كورسەتۋىنە دەيىن جەتكىزۋى ابدەن ىقتيمال.

وتباسىنداعى جانجالدار، قولايسىز پسيحولوگيالىق احۋال مەن اتا-انانىڭ تەرىس مىنەز-قۇلقى دا بالالاردىڭ قاۋىپسىزدىگىنە كەرى اسەرىن تيگىزەدى. ادەتتە ۇيدەگى ۇرىس-كەرىس پەن زورلىق-زومبىلىق كامەلەتكە تولماعانداردىڭ بويىندا سەنىمسىزدىك، تۇراقسىزدىق تۋدىرىپ، ىنجىق جانە جاسىق مىنەز-قۇلىقتىڭ قالىپتاسۋىنا سەبەپ بولادى.

ينتەرنەت پەن گادجەتتەرگە ەركىن قول جەتكىزۋى دە قاۋىپتى. اتا-انالار بالاسىنىڭ تەلەفوندى نەمەسە پلانشەتتى قالاي پايدالاناتىنىن باقىلاماسا، ول بالانىڭ قاۋىپتى ينتەرنەت قاۋىمداستىقتارعا تارتىلۋىنا، زورلىق-زومبىلىقتى ناسيحاتتايتىن تىيىم سالىنعان كونتەنتتى كورۋىنە جانە كۇماندى ادامدارمەن بايلانىس ورناتۋىنا اكەلۋى مۇمكىن. مۇنداي جاعدايلار بالالارعا قاتىستى كيبەربۋللينگ پەن زورلىق-زومبىلىقتىڭ ورىن الۋىنا سەبەپ بولادى.

تاربيەلەۋ فۋنكتسياسىن ۇمىتۋ جانە جەكە ۇلگىنىڭ ماڭىزىن ەلەمەۋ - اتا-انالاردىڭ تاعى ءبىر ۇلكەن قاتەلىگى. كەيبىر اتا-انالار بالالاردى مۇعالىمدەر تاربيەلەۋى ءتيىس دەپ ەسەپتەيدى نەمەسە بالانىڭ نەنىڭ دۇرىس، نەنىڭ بۇرىس ەكەنىن ءوزى تۇسىنەدى دەپ قاتە ويلايدى. بۇل - مورالدىق-ەتيكالىق قۇندىلىقتاردىڭ بۇزىلۋىنا جانە ديەۆيانتتى مىنەز-قۇلىقتىڭ تۋىنداۋىنا اكەپ سوعۋى مۇمكىن.

ايتا كەتەيىك، ۇلتتىق تاسىمالداۋشى بالالاردى پويىزدا تاسىمالداۋ ەرەجەلەرىن ەسكە سالدى.