اتا-انالارعا ەسكەرتۋ! قازاقستاندا الاياقتار بالانى قالاي الدايدى؟

ءى ءى م كەيىنگى كەزدە ينتەرنەتتەگى الاياقتار بالالار مەن جاسوسپىرىمدەردى ءجيى الدايتىنىن مالىمدەدى. سوندىقتان اتا-انالاردىڭ دەر كەزىندە بالالارىنا سيفرلىق قاۋىپسىزدىك ەرەجەلەرىن ءتۇسىندىرۋى اسا ماڭىزدى.

ويىندار ارقىلى

الاياقتار ويىندارداعى ۆيرتۋالدى تاۋارلاردى، ياعني كەيىپكەرلەردى، كيىم-كەشەكتەردى، ءارتۇرلى زاتتاردى ساتۋ ءۇشىن جالعان سايتتار جاسايدى. ەگەر مۇنداي سايتتارعا بانك كارتاسىنىڭ دەرەكتەرى نەمەسە اككاۋنتتىڭ قۇپيا ءسوزى ەنگىزىلسە، ولار بىردەن الاياقتاردىڭ قولىنا تۇسەدى.

پىكىر جازۋ ارقىلى
الاياقتار بالالارعا پىكىر جازعانى ءۇشىن اقشا ۇسىنۋى مۇمكىن. ءبىراق اقشانى شىعارۋ ءۇشىن الدىن الا كوميسسيا تولەۋدى تالاپ ەتەدى. وسىلايشا كارتانىڭ دەرەكتەرى ۇرلانادى.

دروپپەر رەتىندە پايدالانادى
كەيبىر الاياقتار جاسوسپىرىمدەرگە قاراجاتتى قولما-قول اقشاعا اينالدىرۋدى ۇسىنادى. الايدا بۇل - قىلمىستىق سحەمانىڭ ءبىر بولىگى. مۇنداي جاعدايدا وقۋشىنىڭ كارتاسى ۇرلانعان قارجىنى وتكىزۋ ءۇشىن پايدالانىلادى.

پاراقشانى بۇزۋ ارقىلى
الاياقتار الەۋمەتتىك جەلىلەردەگى پاراقشالاردى بۇزىپ، دوستارىنا اقشا سۇراعان حابارلاما جىبەرەدى نەمەسە زيان سىلتەمەلەر تاراتادى.

بالالاردى قورعاۋدىڭ جولدارى:
كۇماندى سىلتەمەلەرگە وتپەۋ؛
بوگدە سايتتارعا كارتانىڭ دەرەكتەرىن نەمەسە قۇپيا ءسوزدى ەنگىزبەۋ؛
ۆيرتۋالدى تاۋارلاردى تەك رەسمي قوسىمشالار ارقىلى ساتىپ الۋ؛
الەۋمەتتىك جەلىلەردەگى بوتتار ارقىلى تولەم جاساماۋ.