ات تاعالايتىن شەگەنىڭ ءوزىن شەتەلدەن الىپ وتىرمىز - ءماجىلىس دەپۋتاتى
ءماجىلىس دەپۋتاتى قازىبەك الىشيەۆ سپورت باعىتىنداعى قازاقى جىلقى سانىن كوبەيتۋ باعىتىنداعى زاڭ جوباسىن تالقىلاۋ كەزىندە جىلقى شارۋاشىلىعىنداعى ەلەۋسىز قالىپ كەلە جاتقان ماسەلەلەردى قوزعادى، دەپ حابارلايدى Kazinform.
«ات سپورتى يندۋسترياسىن دامىتۋ باعىتىندا ءبىلىم سالاسىنداعى زاڭعا دا وزگەرىس ەنگىزۋىمىز كەرەك. سەبەبى ات سپورتىندا ءبىز عىلىمسىز ەشقانداي جەتىستىككە جەتە المايمىز. ماماندار تاربيەلەۋ ماسەلەسى، باپكەر مەن شاباندوز دايىنداۋ ماسەلەسى بار. شاباندوز بالالار سالماعى 40 كەلىدەن اسقاننان كەيىن ەشكىمگە كەرەكسىز بولىپ قالادى. ءارى قاراي ولاردى ات سپورتىنىڭ مامانى رەتىندە دايىنداۋ ماسەلەسى كولەڭكەدە قالىپ كەلەدى»، - دەدى دەپۋتات.
سونداي اق ول زاڭ اياسىندا جالپى سپورت باعىتىنداعى جىلقى شارۋاشىلىعىن تۇتاس دامىتۋعا نازار اۋدارىلۋ كەرەك دەگەن ۇسىنىس ايتتى.
«ات سپورتىن دامىتامىز دەيمىز، ونى تاعالايتىن ماماندار دا دايىندالمايدى. ەلدە ات ابزەلدەرىن جاسايتىن ۇستالار جوق. ەر مەن جۇگەننەن باستاپ بۇكىل ابزەلدى رەسەيدەن اكەلەمىز. ات تاعالايتىن شەگەنىڭ ءوزىن شەتەلدەن الامىز. ساراپشىلار ات يندۋسترياسىنىڭ كولەڭكەلى اينالىمىندا 500 ميلليون دوللارعا جۋىق قاراجات جۇرگەنىن ايتادى. زاڭ جوباسىنا سونىڭ ءبارىن كولەڭكەدەن شىعاراتىنداي نورمالار ەنگىزىلسە دەگەن وي بار. زاڭ اياسىندا قازاقي تۇقىمدا قولداۋ بەرگەنىمىز دۇرىس. الايدا زاڭ اياسىندا جالپى سپورت باعىتىنداعى جىلقى شارۋاشىلىعىن تۇتاس دامىتۋعا نازار اۋدارىلسا دەگەن ۇسىنىس بار»، - دەدى قازىبەك الىشيەۆ.
