اسىراپ العان بالالارىنا جاۋىزدىق تانىتقان ەمشىگە قاتىستى ءىس سوتقا كەلىپ ءتۇستى
شىمكەنت. KAZINFORM - اسىراپ العان بالالارىنا قاتىگەزدىك تانىتتى دەگەن ايىپ تاعىلعان ەمشىگە قاتىستى قىلمىستىق ءىس شىمكەنت قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنا كەلىپ ءتۇستى.

بالالارعا جاۋىزدىق تانىتتى دەگەن كۇدىكتى ەمشىگە قىلمىستىق ءىستىڭ 110-بابى (قيناۋ) جانە 140-بابىمەن (كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋ) ايىپ تاعىلىپ وتىر.
قالالىق سوت باسپاءسوز قىزمەتىنىڭ مالىمەتىنشە، الداعى اپتادا قوعامدىق رەزونانس تۋدىرعان قىلمىستىق ءىستى قارايتىن سۋديا بەكىتىلەدى. سوت پروتسەسى جابىق وتەتىن بولادى.
ءبىز بۇعان دەيىن شىمكەنتتە جەرگىلىكتى تانىمال ەمشىنىڭ 6 بالانى اسىراپ الىپ، ولارعا يت پەن مىسىقتىڭ ەتىن بەرگەنىن، ءۇش جىلدان بەرى ازاپتاپ كەلگەنىن جازعان بولاتىنبىز.
ەمشى ىسىنەن سوڭ ءبىلىم سالاسىنىڭ ءبىرقاتار قىزمەتكەرى جازالاندى. سونىمەن قاتار قالالىق دەنساۋلىق ساقتاۋ باسقارماسىنداعىلار بالالاردىڭ قازىرگى جاعدايى تۋرالى ايتىپ بەردى.
بۇدان وزگە KAZINFORM رەداكتسياسىنا ەمشى اسىراپ العان بالالار تۋرالى تىڭ دەرەك كەلىپ ءتۇستى. ونداعى مالىمەتتە بۇلدىرشىندەردىڭ ءبىرى اتالعان وتباسىعا نەبارى 1,5 ايلىعىندا قامقورلىققا بەرىلگەنى بەلگىلى بولدى. قامقورلىققا بەرىلگەن بالالاردىڭ اراسىندا ءۇش ايلىق ەگىزدەر دە بار.