اسىلدىڭ مۇراتى اسىل: وسكەمەندىك وقۋشى كوميكس ارقىلى الاش ارداقتىلارىن ناسيحاتتاپ ءجۇر
اسىل سۇڭعات قىزى وسكەمەندەگى №3-مەكتەپتە توعىزىنشى سىنىپتا وقيدى. سۋرەتشى قىز وسى قاراشا ايىندا ماعجان جۇمابايەۆتىڭ 130 جىلدىعىنا وراي «باتىر بايان» پوەماسى جەلىسىمەن سۋرەت ءسوز البومىن جارىققا شىعاردى. بۇل - ونىڭ ءۇشىنشى تۋىندىسى. وسىعان دەيىن «الاش كوسەمى»، «ەر توستىك» كوميكستەرى وقىرمانعا جول تارتقان. اسىلدىڭ الداعى ماقساتى - ينتەرنەتتە بالالارعا ارنالعان قازاق ءتىلدى كونتەنت قالىپتاستىرۋ، دەپ حابارلايدى Kazinform.
بالا كۇنىنەن سۋرەت سالعاندى جاقسى كورەتىن اسىل سۇڭعات قىزى كىتاپقا دا ءۇيىر. قازاقتىڭ كلاسسيك اقىن-جازۋشىلارىنان بولەك، شەتەلدىك تۋىندىلاردى دا وقىپ تۇرادى.
وسى ەكى قىرىن ۇشتاستىرعان وقۋشى 2 جىل بۇرىن كوميكس شىعارۋدى قولعا العان.
- ەڭ اۋەلى ءاليحان بوكەيحان تۋرالى «الاش كوسەمى» اتتى كوميكس البوم شىعاردىم. جۇمىستى باستاماس بۇرىن الاش قوزعالىسى جەتەكشىسىنىڭ ءومىر جولىمەن، ەل ءۇشىن ەتكەن ەڭبەگىمەن جان- جاقتى تانىسىپ شىقتىم. البەتتە، ءومىرىن ۇلتىنا ارناعان تۇلعانىڭ ءجۇرىپ وتكەن جولىن شاعىن البوم ارقىلى تولىقتاي جەتكىزۋ مۇمكىن ەمەس. دەسە دە مىنا تەحنولوگيا دامىعان زاماندا وقىرمانعا قانداي دا اقپاراتتى شاعىنداپ، سۋرەتپەن بەرۋ ءتيىمدى دەپ ويلادىم، - دەيدى اسىل.
كوميكس البومدا ءاليحان بوكەيحاننىڭ ءومىر جولىنا قىسقاشا شولۋ جاسالعان. ماتىندەرى دە ىقشامدالىپ بەرىلدى.
كەز كەلگەن وقىرمان از ۋاقىتتىڭ ىشىندە البومدى پاراقتاپ شىعىپ، ۇلت ءۇشىن قۇربان بولعان الاش ارداقتىسىنىڭ ءومىر جولىمەن تانىسىپ شىعا الادى.
- ەكىنشى كوميكسىم - «ەر توستىك» ەرتەگىسى. بۇل ەرتەگى شىتىرمان وقيعاعا تولى بولعاندىقتان تاڭدادىم. ودان كەيىن الاشورداشىلاردىڭ سوزدەرىن جاسوسپىرىمدەرگە ناسيحاتتاۋ ءۇشىن «ستيكەر پاك» جاسادىم. بۇل - جاپسىرما قاعاز. وندا قاناتتى سوزدەر، ولەڭ جولدارى جازىلدى. جاستار «ستيكەر پاكتى» تەلەفونىنا نەمەسە نوۋتبۋگىنە جابىستىرىپ قويا الادى، - دەيدى سۋرەتشى.
ايتا كەتەرلىگى، وقۋشى قىز كوميكستى قالاممەن ەمەس، پلاتشەت بەتىنە گرافيكالىق سۋرەت رەتىندە سالادى. بۇل زاماناۋي ءادىستى مەڭگەرگەن قىلقالام شەبەرلەرى وتە از.
- بيىل ماعجان جۇمابايەۆتىڭ 130 جىلدىعى بولعاندىقتان ونىڭ «باتىر بايان» پوەماسى جەلىسىمەن سۋرەت ءسوز البومىن شىعارۋدى ۇيعاردىم. تۇساۋكەسەرى ا. س. پۋشكين اتىنداعى شىعىس قازاقستان وبلىستىق كىتاپحاناسىندا ءوتتى. بۇل تۋىندىعا 7 ايعا جۋىق ۋاقىت كەتتى. ءار سۋرەتتى اسىقپاي سالىپ، ساپالى دۇنيە شىعارعىم كەلدى. كەيىپكەرلەردىڭ كيىمىن زاماناۋي قىلىپ، اشىق تۇستەردى تاڭدادىم. وسى ورايدا جول نۇسقاپ، اقىل ايتىپ جۇرەتىن جەتەكشىم - سۋرەتشى، جۋرناليست مەرەي قاينار ۇلىنا العىسىمدى بىلدىرەمىن، - دەيدى اسىل سۇڭعات قىزى.
ش. ءۋاليحانوۆ اتىنداعى № 3-مەكتەپ-ليتسەيىنىڭ 9 «د» سىنىپ وقۋشىسى الدا قاي سالاعا بەت بۇراتىنىن ءالى ناقتى تاڭداعان جوق.
ءبىراق سۇيىكتى حوببيىنە اينالعان سۋرەت ونەرىن ءومىر جولىندا سەرىك ەتكىسى كەلەدى.
كەلەشەكتەگى ماقساتتارىنىڭ ءبىرى - ينتەرنەتتە بالالارعا ارنالعان قازاق ءتىلدى كونتەنت قالىپتاستىرۋ.
سۋرەتتەرى تەك كوميكسكە ەمەس، مۋلتفيلمگە دە اينالۋى مۇمكىن.
اسىلدىڭ سىنىپ جەتەكشىسى اينۇر سەرىك قىزى شاكىرتىن ماقتان تۇتاتىنىن جەتكىزدى.
- اسىل - تەك ءبىزدىڭ سىنىپتىڭ ەمەس، مۇقىم مەكتەپتىڭ ماقتانىشى. ۇنەمى ونىڭ جەتىستىكتەرىنە قۋانىپ، تىلەۋلەس بولىپ وتىرامىز. تاربيەلى، مادەنيەتتى، وقۋدا وزات. وڭ قولىما اينالدى دەسەم دە بولادى. مەن جوق كەزدە سىنىپقا باس-كوز بولادى. سىنىپتاستارىنىڭ ءبارى ونى قاتتى سىيلايدى، ايتقانىنا قۇلاق قويىپ تىڭدايدى. بولاشاقتا اسىلدان ەلگە تانىمال مىقتى ازامات شىعاتىنىنا سەنەمىن! ، - دەيدى ول.
اۆتور
تالعاتجان مۇحامەتبەك ۇلى
