استرولوگ ۇلۋ جىلى قازاقستاندىقتار ءۇشىن قانداي جىل بولاتىنىن ايتتى

شىعىس جىلناماسىنا سايكەس 2024 -جىلدىڭ يەسى - ۇلۋ. ۇلۋ - دانالىقتىڭ، كۇش پەن وركەندەۋدىڭ سيمۆولى. سونىمەن قاتار، كۇنتىزبە بويىنشا - كىبىسە جىل، ياعني ءبىرقاتار وزگەرىسكە اكەلەتىن كۇشتى، ەنەرگياعا تولى بولماق. بۇل تۋرالى Kazinform تىلشىسىنە ۋكراينالىق «ەكستراسەنستەر سايىسى» شوۋى 15-ماۋسىمىنىڭ فيناليسى، استرولوگ، پسيحولوگيا عىلىمدارىنىڭ دوكتورى يۋليا كاسمان ايتتى.

استرولوگتىڭ ايتۋىنشا، ۇلۋ جىلىنىڭ ءبىر ەرەكشەلىگى - ول بارلىق ۋاقىتتا كىبىسە جىلدارمەن تۋرا كەلەدى. ءتورت جىلدا ءبىر رەت قايتالانىپ كەلەتىن باسى ارتىق ءبىر كۇن 2024 -جىلدىڭ اقپان ايىنىڭ ۇلەسىنە تيەدى. وسىلايشا كەلەسى جىل 366 كۇننەن تۇرادى.

ۇلۋ سۋدا جۇرەتىن بولعاندىقتان، بۇل جىلى قۇرعاقشىلىق بولمايدى. جىل تىنىشتىقپەن، بەرەكە-مولشىلىقپەن وتەدى.

«الداعى جىل كۇنتىزبە بويىنشا - كىبىسە جىل، ياعني ول ءبىرقاتار وزگەرىسكە اكەلەتىن ەرەكشە كۇشتى، ەنەرگياعا تولى بولادى. ەشقانداي كاتاكليزمدەر كورىپ تۇرعانىم جوق. ۇلۋ جىلى قازاقستاندىقتار ءۇشىن وتە جايلى، بەرەكەلى جىل بولماق»، - دەيدى ول.

جورامالشىنىڭ سوزىنشە، 2024 -جىل قىتاي كۇنتىزبەسى بويىنشا جاسىل اعاش ايداھار جىلى بولادى. بۇل جىل شىعارماشىلىق، جاڭاشىلدىق جانە جاڭا باستامالار ءۇشىن قولايلى بولماق.

«قازاقستان ءۇشىن جىل تابىستى، بەرەكەلى بولادى. كوپتەگەن قازاقستاندىق وتباسىندا، تۋعان جەرىندە باقىتقا كەنەلەدى. كاسىپتەرىن دامىتىپ، مانسابىندا تابىسقا جەتەدى. ۇلۋ جىلى ونەر ادامدارىنىڭ جولى ەرەكشە بولماق. ايداھار باتىل جانە جىگەرلى ادامداردى جاقسى كورەدى، ءبىزدىڭ ەلدە ونداي جاندار وتە كوپ. سونداي-اق 2024 -جىلى جومارت، اقپەيىل جانە كەشىرىمدى بولعان ابزال»، - دەيدى استرولوگ.

سونداي-اق يۋليا كاسمان جاڭا جىلدى قانداي ءتۇستى كيىممەن قارسى الۋ كەرەكتىگىن ايتتى.

«قىتاي كۇنتىزبەسى بويىنشا، جاسىل اعاش ايداھار 10-اقپاندا كىرەدى. وعان لايىقتى تۇستەر: جاسىل ءتۇس - حاكيدەن باستاپ زامارتاس تۇسىنە دەيىن. سونداي-اق بۇلاردى كۇمىس، التىن جانە قىزىل تۇسپەن ۇيلەستىرۋگە بولادى. اس مازىرىنە كەلەر بولساق، ساتتىلىككە جول اشۋ ءۇشىن سەگىز ماندارين نەمەسە اپەلسيندى تاماق سالىنعان ىدىستىڭ اينالاسىنا قويۋ كەرەك. داستارحاندا قىلقان اعاشتىڭ جاپىراعى مەن سۋ تۇرۋى قاجەت. نەگىزى، الۋان ءتۇرلى اس ازىرلەۋگە بولادى. ەشقانداي شەكتەۋ جوق. كەلەر جىلدىڭ يەسى، ساتقىندىق پەن وتىرىكتى ۇناتپايدى. جاڭا جىلدى بارىنشا كوتەرىڭكى كوڭىل-كۇيمەن قارسى العان دۇرىس»، - دەيدى پسيحولوگيا عىلىمدارىنىڭ دوكتورى.