اۋستراليادا سوڭعى 40 جىلداعى ەڭ قالىڭ قار جاۋدى

استانا. KAZINFORM - اۋستراليادا دەمالىس كۇندەرى قار جاۋا باستادى.

سەنبى كۇنى جاڭا وڭتۇستىك ۋەلس شتاتىندا 40 سانتيمەترگە دەيىن قار جاۋىپ، 1980 -جىلداردىڭ ورتاسىنان بەرگى رەكوردتى جاڭارتتى، دەپ حابارلادى اۋستراليا مەتەرولوگيا بيۋروسى قىزمەتكەرى ميريام برەدبەري.

ەلدىڭ مەتەورولوگيا بيۋروسى اۋستراليانىڭ كوپتەگەن قالاسىندا سوڭعى ونجىلدىقتارداعى ەڭ قالىڭ قار جاۋىپ تۇرعانىن ايتتى. كۆينسلەند شتاتىنىڭ كەيبىر اۋدانىندا ونجىلدىقتا العاشقى قار جاۋدى.

BBC اۋستراليالىقتاردىڭ قاردا ويناپ، اياز اتا جاساعانى بەينەلەنگەن ۆيدەو جاريالادى. ءبىر ەر ادام جۋرناليسكە «ومىرىندە قاردى ءبىرىنشى رەت كورىپ تۇرعانىن» ايتتى.

قار جاي عانا قۋانىش كەلتىرمەدى. دەمالىس كۇندەرى جاڭا وڭتۇستىك ءۋەلستىڭ كەيبىر بولىكتەرىندە قالىڭ قار مەن جاڭبىر 1455 وقيعاعا سەبەپ بولدى. توتەنشە قىزمەتتەر 100 دەن استام كولىكتىڭ قار قۇرساۋىندا قالىپ قويعانىن، بوران عيماراتتاردى ءبۇلدىرىپ، كەيبىر اۋدانداردا ءىرى سۋ تاسقىنى بولعانىن حابارلادى. ونداعان ءۇي جارىقسىز قالدى. پوليتسيا سۋ تاسقىنى اعىپ كەتكەن 26 جاستاعى ايەلدى ىزدەپ جاتقانىن ايتتى.

جاڭا وڭتۇستىك ۋەلس - اۋسترالياداعى حالقى ەڭ كوپ شتات. سيدنەي وسى شتاتتا ورنالاسقان.

جاھاندىق كليماتتىڭ وزگەرۋى سوڭعى جىلدارى اۋستراليانىڭ اۋا رايىن تۇراقسىز ەتتى. دەگەنمەن قۇرلىققا بۇرىن دا قالىڭ قار جاۋعان.

اۆتور

بەگابات ۇزاقوۆ