استانالىق زەينەتكەرلەرگە قانداي الەۋمەتتىك كومەك ۇسىنىلىپ وتىر

 استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ەركەبۇلان مالىك وڭىرلىك كوممۋنيكاتسيالار قىزمەتىندە زەينەتكەرلەرگە كورسەتىلەتىن الەۋمەتتىك قىزمەتتەر تۋرالى بريفينگ وتكىزدى، دەپ حابارلايدى قازاقپارات ءتىلشىسى. 

зейнеткер
Фото: pixabay.com

باسقارما وكىلىنىڭ سوزىنشە، ەلوردادا 120 مىڭنان استام زەينەتكەر تۇرادى. ونىڭ ىشىندە 106807 ادام جاسى بويىنشا زەينەتكە شىقسا، 13074 ادام ەڭبەك ءوتىلى بويىنشا زەينەتكەر اتانعان (اسكەري قۇرىلىمدار). سونداي-اق، ەكىنشى دۇنيەجۇزىلىك سوعىستىڭ 8 ارداگەرى، 1473 تىل ارداگەرى بار.

«جىل سايىن ساناتوريالىق- كۋرورتتىق ەمدەلۋگە 3500 دەن استام زەينەتكەر جىبەرىلەدى. جىل باسىنان بەرى 3357 ادام جولداما الدى. جالپى، 2023 -جىلعا 4298 ادامدى كۋرورتپەن قامتاماسىز ەتۋ جوسپارلانعان.

1-قازان - قارتتار كۇنىنە وراي زەينەتكەرلەرگە 2,5 ا ە ك مولشەرىندە (8625 تەڭگە) ءبىر رەتتىك تولەم بەرىلەدى.

ەكى جىلدا ءبىر رەت ءتىس پروتەزدەۋ، ەمدەۋ قىزمەتتەرى بار. 2023 -جىلى 3000 ادامعا وسىنداي قىزمەت كورسەتۋ جوسپارلانعان. بۇگىنگى تاڭدا ءتىس پروتەزدەۋ جانە ءتىس ەمدەۋمەن 1529 ادام قامتىلعان. اتالعان قىزمەتتەرگە تىركەلۋ ەسەپتى جىلدىڭ 2 توقسانىندا جۇرگىزىلەدى»، - دەدى ول.

اكىمدىك وكىلى جەر ۇيدە تۇراتىن زەينەتكەرلەرگە كومىر الۋ كەزىندە جەڭىلدىك ۇسىنىلاتىنىن ايتتى. ول ءۇشىن زەينەتكەر تۇراتىن ءۇيدىڭ وتباسىلىق تابىسى جان باسىنا شاققان كەزدە ەڭ تومەن كۇنكورىس دەڭگەيىنىڭ 4 ەسەسىنەن (213240 تەڭگە) اسپاۋ كەرەك.

«وتەماقى جىلىتۋ ماۋسىمىنا 16 ايلىق ەسەپتىك كورسەتكىش (55360 تەڭگە) كولەمىندە جۇرگىزىلەدى. بيىل 99 وتباسىعا وسى كومەك بەرۋ ءۇشىن 5,4 ميلليون تەڭگە جۇمسالعان.

تۇرعىن ءۇيدى گازداندىرۋعا قاراستىرىلعان الەۋمەتتىك كومەكتىڭ مولشەرى 130 ايلىق ەسەپتىك كورسەتكىشتەن اسپايتىن مولشەردە بولۋى كەرەك - 448500 تەڭگە.

ءۇي يەلەرىنە تۇرعىن ءۇي كومەگى اتالعان كومەك كوممۋنالدىق قىزمەتتىڭ ايلىق اقىسى وتباسىنىڭ ايلىق جيىنتىق تابىسىنىڭ 5 پايىزىنان اساتىن بولسا عانا (تولەمنىڭ ورتاشا مولشەرى ايىنا 25 مىڭ تەڭگەگە دەيىن) قاراستىرىلادى. زەينەتكەرلەرگە قالالىق جولاۋشىلار كولىگى باعىتتارىندا تەگىن ءجۇرۋ جەڭىلدىكتەرى بار»، - دەدى ەركەبۇلان مالىك.

سونداي-اق، ول «بەلسەندى ۇزاق ءومىر ءسۇرۋ ورتالىعى» كوممۋنالدىق مەملەكەتتىك مەكەمەسى جۇمىس ىستەپ تۇرعانىن ەسكە سالدى.

بۇل ورتالىقتا 27 ءتۇرلى باعىتتا ۇيىرمەلەر، سەكتسيالار ۇيىمداستىرىلىپ، سپورت زالى، كومپيۋتەرلىك سىنىپ، ۆوكال، شىعارماشىلىق شەبەرلىك سىنىبىمەن جابدىقتالعان، مادەني ءىس-شارالار (پوەزيا كەشتەرى، كىتاپ تۇساۋكەسەرى جانە ت. ب. ) تۇراقتى وتكىزىلىپ تۇرادى.

قالانىڭ ءتورت اۋدانىندا وسى ورتالىقتىڭ فيليالدارى بار: «ەسىل» اۋدانىندا دوستىق كوشەسى-13، «بايقوڭىر» اۋدانىندا اباي كوشەسى-46، «سارىارقا» اۋدانىندا بەيبىتشىلىك كوشەسى-25 ءۇي، «الماتى» اۋدانىندا قوشقاربايەۆ كوشەسى-29 ءۇي.

«سونىمەن قاتار، قالادا «شاراپات» الەۋمەتتىك قىزمەت كورسەتۋ ورتالىعى قارتتار مەن مۇگەدەكتىگى بار ادامدارعا ساپالى قىزمەت كورسەتۋدىڭ تولىق كەشەنىن ۇسىنادى. الەۋمەتتىك قىزمەت مۇگەدەكتىگى بار ادامدارعا جانە زەينەتكەرلىك جاسقا تولعان، ءوزىن-ءوزى كۇتۋگە قابىلەتسىز جانە دەنساۋلىعىنا بايلانىستى ستاتسيونارلىق جانە ءۇي جاعدايىندا ارنايى الەۋمەتتىك قىزمەتتەردى قاجەت ەتەتىن قارت ادامدارعا كورسەتىلەدى. اعىمداعى جىلى ارناۋلى الەۋمەتتىك قىزمەت تۇرلەرىمەن 1027 ادام قامتىلعان.

اكىمدىكتىڭ انىقتاماسىنا سۇيەنسەك، استانا اكىمدىگىنىڭ «قارتتارعا، مۇگەدەكتىگى بار ادامدارعا جانە مۇگەدەكتىگى بار بالالارعا ارنالعان وڭالتۋ ورتالىعى» مەكەمەسى شۋچينسك- بۋراباي كۋرورتتىق ايماعى مەن قوتىركول جاعاسىندا زەينەتكەرلەرگە جىلىنا ءبىر رەت قىزمەت كورسەتەدى.

ول قىزمەتتىڭ شارتتارى مىنانداي:

- جاسى بويىنشا زەينەتكەرلەر جولداما قۇنىنىڭ %25 پايىزىن (56700 تەڭگە) تولەۋ كەرەك؛

- ەڭ تومەنگى مولشەردەگى زەينەتاقى الاتىن زەينەتكەرلەر جولداما قۇنىنىڭ %18 پايىزىن (40824 تەڭگە) تولەۋ قاجەت؛

- سوعىس ارداگەرلەرىنە، ەكىنشى دۇنيەجۇزىلىك سوعىس ارداگەرلەرىنە تەڭەستىرىلگەن تۇلعالارعا - تەگىن.

سوڭعى جاڭالىقتار